Dan bawhchhia a Buhfai leina ah mipui sum tam tak mimal kut-ah a luanglut niin a lang - MLP

MNF Legislature Party (MLP) chuan Food Civil Supplies & Consumer Affairs Deptrtment-ah nasa taka Sawrkar dan dinglai bawhchhiat avangin Department in buhfai a leinaah mipui sum tam tak mimal thenkhat leh anmahni duhsaktute kutah a luanglut nia a lan thu an sawi.

Nimin-a Aizawl Press Club-a thuthar thehdarhtute an kawmna ah MNF Legislature Party chuan Supply Department in buhfai lei tura Tender a chhuah danah dan dinglai nasa takin a bawhchhia nia sawiin, Mizoram Public Procurement Rules 2020 chuan Limited Tender/Restricted Tender hmangin cheng nuai 25 aia tam man thil lei a khap thu leh buhfai leina ah hian he Dan hi nasa tak bawhchhiat a nih thu an sawi a. Hei mai bakah hian cheng nuai sangbi man Tender-ah hian Earnest Money pawh Tenderers te an dahtir lo bawk niin an sawi a. Tender chhang hniamber RL Store Kulikawn te chu dan palzuta hnawlin a aia nasa taka chhang sang zawk LZ Juice, Melthum te supply hna tam tham tak pek an nih thu pawh sawiin, hemi chungchanga RTI Dan hmanga zawhna an siam Supply Department in an chhanna ah ‘Tender chhang hniam ber RL Store Kulikawn an thlanloh chhan chu Buhfai ‘C’ Grade supply tura Tender an chhan vang’ tia tarlan a nih thu an sawi a, “Mahse RL Store ten Tender an chhanna copy a alan danin Buhfai ‘A’ Grade supply tura chhanna pe ngei an ni tih a chiang,” an ti a. Hemi avanga sawrkar sum hloh tur chu a tam hle niin an sawi bawk.

MNF Legislature Party chuan Supply Minister hian ‘Buhfai supplier thlannaah ka inrawlh lo’ tia a sawi thu Media Report-ah an lo hmu tih pawh sawiin, “SPAB Minutes hi File ah a approved ngei a ni tih notesheet-ah chiang takin a lang. Heti chunga midang mawhpuha buhfai Supplier thlannaa inrawlh lo anga a insawi fo hi mipui leh a Department hnuaia SPAB ngei pawh zahlohnaah kan ngai a, mawhphurhna la ngamlo Supply Minister kan nei hi a vanduaithlak takzet a. Keini MLP te chuan dan zawm lova buhfai man to zawka lei anih avanga sum nuai za tam tak chingpen ah hian Supply Minister ngei hi a mawhphurtu ah kan ngai a, Chief Secretary leh midangte a puhmawh hi pawm chi ah kan ngailo,” an ti.

Ration Card Var hmangtuten buhfai kg. khat Rs. 15/- a an lei thin kg. khat Rs. 30/- (100% a tihsan) ni tura ZPM sawrkar in a ti chu uchuak an tih thu pawh MNF Legislature Party chuan sawiin, “Hetiang mi tam tak khawsak relna kawnga harsatna siam tur chungchanga rawtna intan dan leh thutlukna siam a nih dan hi pawm theih niin kan hrelo,” an ti a. “Buhfai chungchanga Sawrkar hmasa te ro lo rel tawh dante leh mipuite zahpahna nei miah lova ZPM sawrkarin buhfai man 100% a tipung tura thutlukna a siam hi rang taka ennawna a rawn awm, mipui aiawh NGOs te leh Political Parties te rawnin thutlukna siam chauh nise kan ti a, MNF Party chuan mipuite harsatna thlirin a let a tihpun hi kan do tlat a ni,” an ti bawk.

Tunhnaia Hachhek bial-a Mizo khaw hlun tak Phuldungsei khuaa Mizoram Ration Card neitu mi 85 lai an Ration Card paih sak (deleted) a ni chu Hnam pawikhawihna lian tak a nih thu pawh MLP chuan sawiin, “Sawrkar hmasa zawng zawngin Phuldungsei khua leh a mi chengte hi Mizoram Sawrkar hmasa ten Voters, Ration Card etc. hun rei tak atanga an lo pek tawh an ni,” an ti a. Tripura Sawrkar chuan an duhlo chung pawh an Ration Card te an delete duh reng reng lo nia sawiin, “He Hnam issue ah hian Mizoram Sawrkar hi thangharh se Ration Card hi pe let nghal se, tun hnuah pawh fimkhur se kan ti. He Hnam issue ah hian Sawrkarin puih an ngaih chuan kan in huam tih kan puang duh a ni,” an ti a. Sawrkar chu Thla 8 dawn an sawrkar hnuah an tih tur an sawi lam hawi ve tawh se tih chu an beisei dan a nih thu an sawi bawk.