Police te kutthlaktu thubuai siam sak phut; Tlabung-a YMA in inkalpawh rem an ti rih lo

Borapansury khuaa Chakma-in Mizo Police pahnih an sawisakna a mawhphurhtute case siam sak phutin nimin khan Aizawl-a Chakma MLA pahnih te chenna kawtah MZP te chu an pungkhawm.

Tarlan tawh angin niminpiah-a MZP General Headquarters Executive Committee thukhawm chuan Borapansury khuaa Mizo Police pahnihte sawisaa, kutthlaktu Chakma-te chu case siam saka an phu tawk hremna pe ngei turin Sawrkar a lo ngen bakah Chakma pawn chhuah an khap bawk a. Chakma-te pawn chhuah khapna chu zawm a nih leh nih loh enfiah turin nimin zing khan MZP chuan hnatlang a ko a. Aizawl Hunthar-a Chakma House leh Chakma MLA pahnihte chenna Legislator Home Tuikhuahtlang kawt-ah te punkhawm a ni. He punkhawmna a tel te hian Resolution pahnih siamin Borapansury-a thil thleng chungchângah FIR thehluh niin, register tawh a nih thu leh vhak taka bawhzui tur leh a mawhphurhtu misual te na taka hrem tura sawrkar an ngen thu an tarlang a; Mizoram Sawrkar-in a mi leh sa sawisak a nih chungchangah, misualte chet dan hi Magisterial Enquiry la ngei se an duh thu leh misualte rang takin chhuichhuak a hremna pek ngei an duh thu te an tarlang a ni.

MZP te hmalakna chungchang ah Home Minister K. Sapdanga'n MZP hruaitute leng tura a sawm angin, nizan hmasa khan Home Minister hi a chenna In-ah an hmuh bakah nimin chhun-a an punkhawmna hmunah Home Secretary Vanlalmawia MCS, DIG (Northern Range) H Ramthlengliana IPS leh Police hotute nen MZP duhdan hrang hrangte sawiho leh bawk a. Home Department hotute leh Police hotute chuan, MZP duhdan anga hmalak mek a nih thu leh, hemi chungchangah FIR pawh a luh tawh thu an sawi a. Chhui chian mek a nih thu leh thiltisual tute case siamsak ngei an tum thu an sawi avangin MZP chuan punkhawm hi an titawp rih tih an sawi a ni.

Borapansury-a Mizo Police-te chunga khawtual mi thenkhatte chet dan nghawng kal zelah nimin zing khan Tlabung leh a chhehvela YMA Branch hrang hrang inzawmkhawmna Khawthlangtuipui Group YMA-te chu Borapansury-a thil thleng thlirhoin an thukhawm a, Vawiin atang hian ei theih lam chi leh ei theih loh lam chi thlengin Chakma khuaa pek chhuah an khap bakah Chakma khuate nena inkalpawh an remtih rih loh thu puangin, khawchhunga Chakma-te pawh pawna chhuak lo turin an chah bawk a. Khawthlangtuipui Group YMA chuan, tunhma deuha YMA leh YCA hruaituten, 'Chakma khuaa Mizoten buaina an siam palh a nih pawhin YMA kutah hlan thin ni rawh se' tia thu an lo dah tawh chu bawhchhiat a ni tih sawiin, tun tuma thil thlenga mawhphurtute lakah thubuai siamsak an phût tih an sawi bawk a ni.