LESDE Minister in Construction Workers Welfare Board-a inziaklut turin a sawm

LESDE Minister Lalnghinglova Hmar chuan Construction Workers Welfare Board-ah a inziaklut thei te inziak lut vek turin a sawm.

Nimin-a Assembly thutkhawm ah Champhai North bialtu MLA H. Ginzalala zawhna a chhannaah LESDE Minister Lalnghinglova Hmar chuan Labour Cess tlingkhawm chu Building & Other Construction Workers (Regulation of Employment and Condition of Service) Act, 1996 section 22-in a sawi angin Construction Workers, Welfare Board-a Member inziaklut te tan tangkai leh hlawk taka hman thin a nih thu a sawi a, hemi bakah hian Building & Other Construction Workers (Regulation of Employment and Condition of Service) Act, 1996 section 22 sub-section 1(h) behchhanin Scheme dang siam belh theih a nih thu a sawi bawk.

LESDE Minister chuan Labour Cess tlingkhawm chu tangkai zawka hman theih dan dap a nih thu leh he Danin a sawi dan chuan Labour Cess tlingkhawm chu Welfare-a inziaklut Labour-te leh an chhungte tan chauha hman theih tih a ni a, a hmangtu an tlem a, a hman theih loh dan a tam bawk si avangin Labour Cess chu a tlingkhawm lo thei lova, mahse a hman theih dan ngaihtuahin, kumin June thlaa Welfare Board thutkhawm hmasak berah duan a ni a, dan bawhchhe si lova a hman theih dan tihpun an tum thu a sawi a ni.

Lalnghinglova Hmar chuan, tun dinhmunah he Welfare-ah hian mi 17,704 inziaklut an awm mek tih sawiin, Mizorama Building leh Construction Worker-te chu hamthatna dawng thei turin a tam thei ang ber inziaklut se an duh avangin hemi chungchang Multi-Media Campaing pawh buatsaih tum a nih thu leh District hrang hrangah Membership Drive neih tum a nih thu a sawi a, inziahluh harsa an tih thin avangin online-a inziahluh theih dan tur pawh sawiho mek a ni tih a sawi bawk.