Mizoram Assembly thutkhawm zawhfel a ni

Ni hnih chhung awh Mizoram Legislative Assembly thutkhawm chu nimin khan zawhfel a ni.

Ni 2 awh tun tum Assembly thutkhawm ah hian MLA hlui tunhnaia boral Kapoor Chand Thakuri sunna hun hman a nih bakah House-ah Report 10 leh sawrkar lehkha pawimawh 13 pharh a ni a, Social Welfare Minister Lalrinpuii'n Official Resolution a putluh chu sawiho a nih hnuah House in a pawm a. Bill 5 putluh chu sawiho a nih hnuin pawm vek a ni. Tun tum Session-ah hian House-a chhan chi zawhna lut 273 zinga 263 pawm a ni a, ziaka chhan chi zawhna 17 lut chu pawm vek a ni bawk. Nimin thutkhawm ah Assembly Speaker Lalbiakzama chuan, tun tum Session-ah hian Department 4 atangin zawhna 7 chhan loh a awm thu sawiin, Revenue Department a zawhna 3 awm chu chhan loh vek a nih avangin MLA-te zawhna chhan kawngah Department-te tan an ngai tih a sawi a. Assembly Committee ten Report 8 lai an nei thei chu fakawm a tih thu a sawi bawk.