Online hmanga inbumna ah mipuite fimkhur turin chah

Serchhip District Bawrhsap chuan Online hmanga inbumna (Online scamming) a tam avangin mipuite chu fimkhur turin a chah.
Hemi chungchanga thu-chhuah a siamah Serchhip District Bawrhsap Paul L. Khuma chuan Online scamming (Online hmanga inbumna) a tam avangin mipuite chu hriatchian loh Link click mai lo tur leh phone number leh personal details te an hriatchian loh lakah pe mai mai lo turin a ngen a. Heng mi bum chingte hian mi Social Media Account heng- Whatsapp/Telegram/Instagram leh a dangte te hack sakin, an lem changin pawisa leh an Bank account details-te an pek ngei theih nan midang nihna (Whatsapp ah mi thlalak leh hming) hmangin pawisa an dil thin tih a sawi a. Hetiang tawng an awm a nih chuan an phone number te block sakin, Bank Account/Pawisa thawn chungchangah engmah hmalak loh tur a ni tih a tarlang a. Hetiang inbumna lak ata mipuite an lo him theih nan Social Media platform hrang hrangte fimkhur taka hmang thin turin mipuite chu a chah bawk a ni.