NIRF Ranking-ah NE atangin PUC an sang ber

National Institutional Ranking Framework (NIRF) Ranking tihchhuah thar berah Pachhunga University College (Mizoram) chu 35-na niin India hmarchhak-ah a sang ber a ni.

He Ranking hi Department of Higher Education, Ministry of Education, Govt. of India siam niin a vawi 9-na atan niminpiah khan Union Minister of Education Dharmendra Pradhan chuan a tlangzarh a, Categories 16 awmin Categories hrang hrangah hian avaiin zirna In sing 10,845 an tel a, PUC hi College Category-ah telin kumin hian College Category-ah College 3,371 an tel a, nikum aiin 625 in an tam a. He College tha thlan ah hian PUC chu 35-na a ni. He Category-ah hian India hmar-chhak State hrang hrang zingah Assam atangin College 110, Manipur atangin College 29, Tripura atangin College 19, Nagaland atangin College 7, Meghalaya atangin College 9, Arunachal Pradesh atangin College 5, Sikkim atangin College 2 leh Mizoram atangin College pakhat, a vaiin College 182 an tel a, College tha thlanchhuah 100 zingah PUC chiah hmarchhak atangin a lang phak a ni.

NIRF Ranking 2024-ah hian Hindu College, Delhi chu pakhatna niin Miranda House, Delhi chu pahnihna a ni bawk a, pathumna ah t. Stephens's College Delhi awmin Rama Krishna Mission Vivekananda Centenary College, Kolkata chu palina a ni a. Atma Ram Sanatan Dharm College, New Delhi chu pangana a ni bawk.

Chief Minister Lalduhoma chuan NIRF Ranking-ah Pachhunga University College in 35-na leh MZU in University-ah 77-na a hauh chu Zirtirtu, zirlai leh hnathawk zawng zawng te a lawmpuiin a chhuang takzet tih a sawi a. ZPM Thalaite pawhin kum thum ngawt mai a zâwn a India rama college thazual NIRF-in a thlanchhuah ah Top 50-ah Pachhunga University College a lang thei chu ropui an tih thu an sawi bawk.