Aizawl-ah mumal taka Tui pump theih thuai beisei

PHE Department chuan Aizawl khawpui ah tun atanga thla khat chhungin tui pump dan a mumal tawh beisei a nih thu leh tui mumal taka sem tur erawh chuan hun a la duh deuh dawn tih an sawi.

Nimin-a PHE Minister Prof. Lalnilawma’n thuthar thehdarhtute a kawmna ah PHE Department-a SE Lalrinzuala chuan Aizawl khawpui chhunga tui dinhmun chungchang hi sawiin, Cyclone Remal avanga tuilianin nghawng a neih tam thu a sawi a. Tui Pump khawl tam tak tuilianin a chim a, Electric Power lakna Hruipui leh Control Panel te a tichhia a, Inkalpawhna kawngte nasa taka tibalin Duty Room leh Store Room-te chu a tichhe hneh hle tih a sawi a, June ni 1 atang khan GAWSS Phase-II Pump pakhat hmangin Tuikhuahtlang Tuizem-ah tui pump luh tan a ni leh tawh tih a sawi a. Khawl thenkhat leh Control Panel pahnih chu Guwahati-ah siamtir mek a la ni tih leh Ningani atang hi chuan khawl thenkhat chu peih hman tura beisei a nih thu sawiin, mumal taka Tui sem tur chuan hun ala duh deuh dawn thu a sawi a ni.