NH. 302 a hnathawh enfiah

Lunglei leh Tlabung inkar National Highway-302 kawngpui laih zauh hna thawh mek dinhmun leh Fur ruahsur avanga lirthei tlan leh khualzinte'n harsatna an tawh thin sutkian a nih theih nana hmalak dan tur chu nimin khan Inspection Team ten an enfiah.

Lunglei District Bawrhsap R. Lalthazuala ruahmanna a kal Inspection Team ah hian Addl. DC Rochuangkimi Khenglawt bakah Settlement Officer Lalrinawma leh Land Revenue & Settlement Department, Lunglei a thawktute an tel a. Helai kawngpui zauh hna thawh mek enkawltu National Highways & Infrastructure Development Corporation Limited (NHIDCL) hnuaia Authority Engineer-te leh Contractor-te'n lo dawngsawngin an hna thawh mek dinhmun leh harsatna an neihte an lo hrilhfiah a. Fur ruahsur leh leimin avanga kawngpui chhe lai te, leivung paihna hmun ruahman dan te, hmun thum - Chhum-khum, Lungsen leh Tuichawng-a khawchhung helna kawng (by-pass road) siam mek te en ho niin, NH-302 kawngpui chu mipui chakkhai leh mamawh phurhna kawngpui pawimawh a nih angin lirthei veivak leh khualzin mipuite'n harsatna an tawh loh nana chak zawka hnathawh a nih theih dan turte leh kawng chhe zual lai thawmthat thuai a nih theih dan tur te sawi ho a ni.

NH-302 kawngpui zauh hna thawh mek hi Hrangchalkawn atanga Tlabung thleng niin kawng hluiah chuan KM 96-a thui a ni a. Tuna kawng thar ruahman ang chuan KM 75.070-a thui tur niin Package hnihah then a ni a. Package A hi Hrangchalkawn atanga Chhumkhum thleng, KM 37.420-a thui niin Package B hi Chhumkhum atanga Tlabung thleng, KM 37.650-a thui a ni a. BRN Infrastructures Private Limited (BRNIPL) te'n thawkin, tun dinhmunah Package A-ah 38.20% leh Package B-ah 37.65% an zo tawh a. Kawng laih leh kawng luan bakah lui kawr kanna tur lei dawh tur pali (major bridge 3 leh minor bridge 1) a awm bawk a ni.