Mamit-ah National Handloom Day lawmna nei

National Handloom Day vawi 10-na chu nimin khan Mamit-ah lawm a ni a, Agriculture Minister PC. Vanlalruata chuan khuallian niin a hmanpui a ni.

Mamit Chhim Veng Hall-a National Handloom Day lawmna ah hian Agriculture Minister chuan Handloom chu kan pi leh pu te hun atang tawhin kan silh leh fen kan dinna a nih thu sawiin, tun thlengin Mizote rilruah a pawimawh thu a sawi a. State dangte ngaituahin a bik takin Mizo hmeichhia te tan a hlut zual chhan chu chawlhni a an incheina pawimawh tak a nih thu a sawi a, Mizo hmeichhiate dinhmun chawikang turin Handloom Industry thanlen chu hmalam pan zelna atan a tul thu a sawi bawk. He hunah hian Minister chuan MHIP Mamit te chu eizawnna tling leh tlak a Handloom a tan la turin a sawm a, ZOHANDCO hmalakna chu thahnemngaihpui leh thawhhona tha neih pui turin a ngen bawk. Handloom Industry chu Industry lian ber pawl a nih avangin eizawnna innghahna tlak tam tak a siam a, Mamit District tan pawh a eizawnna pawimawh tak anih theih nan MHIP te chu tan la turin Minister chuan a sawm a ni.

National Handloom Day lawmna hun hi Mizoram Handloom & Handicrafts Development Cooperation Ltd (ZOHANDCO) buatsaiha neih niin Devleopment Commissioner (Handlooms), Ministry of Textile, Government of India in a sponsor a ni a. Chawhnuah Handloom lama eizawnna haihchhuah dan Workshop/Awareness Programme hman a ni bawk.

National Handloom Day hi kum 2015 atang khan lawmna hun hman tan a ni a, Prime Minister Narendra Modi-a’n Chennai-ah hawngin, kumin hi vawi 10 hmanna a ni a. Mizoram District hang hrang-ah lawmna hun hi neih a ni a. Mamit Charkawn-a Siamliana Hall-ah Handloom Exhibition hawihawt niin Stall 26 hawn a ni a, Mizoram District hrang hrang atangin Handloom dawr neituten puan mawi tak tak pho langin, mipuite dawr theih turin tun thla ni 9 thleng hawn a ni bawk ang.