Ramri-a cheng te himna turin ruahmanna siam

Lawngtlai District Bawrhsap Cheemala Siva Gopal Reddy chuan Bangladesh ramchhung buaina avangin ramri hnai-a awm mipuite himna turin ruahmanna a siam.

Hemi chungchanga Lawngtlai District Bawrhsap in thuchhuah a siam ah chuan Lawngtlai District huamchhung, Bangladesh leh Myanmar ramri hrula chengte an him nan leh thlamuang leh hahdam taka nunphung an lo hman theihna turin ramri leh a bulhnai KM 3 huamchhung ah tlai dar 6:00 leh zinglam dar 6:00 inkar-ah Mihring a huho emaw, a malin veivah phal a nih loh thu te; Ran rual khalh luh emaw khalh chhuah phal a nih loh thu leh Lirthei eng chi mah veivah phal a ni lo tih a tarlang a. He thupek zawm lo chu Section 223, Bharatiya Nyaya Sanhita (BNS) 2023 hmanga hrem theih an nih thu leh he thupek hian Lawngtlai District Indo-Bangladesh leh Indo-Myanmar Border KM 3 huamchhung te a huam thu a sawi a. He thupek hi thu leh a awm a nih loh chuan thla hnih (2) chhung atana tihchhuah a ni.

Hetihlai hian Lunglei District-ah pawh Bangladesh kaihhnawihah tho hian Lunglei District thuneitute chuan boruak awm dan thlithlai reng turin Tlabung leh Lungsen BDO leh SDO (C) an hrilh a. Hemi chungchang ah hian thupek emaw a hranpa a chhuah erawh a la awm rih lo a, ramri vengtu BSF te pawh boruak awmdan ngaichangin an dan pangngaiin ramri-ah hian mit leh beng chhiin an awm mek a ni.