MNYF in tha an tih loh thu sawi

MNF Thalaite chuan ZPM sawrkar hnua khawchhak atanga dan lova kuhva ro lo luh thar nasat dan leh kudam a awm sa te ZPM sawrkar in a enkawl dan chu tha an tih loh thu an sawi.

Nimin-a thuchhuah an siamah MNYF Hqrs. chuan June 26, 2024-a Kuhva Chingtu Pawl te leh Kolasib SP, Vairengte Civil SDO leh SDPO te nena Kuhva kudam an enho a an kalh thlap atangin kuhva bag 5849 a bo tih hriain MNYF Hqrs. hruaitute chuan July 20, 2024-ah a hmunah an tlawh thu leh hemi tum hian Vairengte SDPO pawh an kawm thu sawiin, hemi tum hian MNYF hruaitute hian Phaisen-a kuhva man sa Bag 678 pawh a hmunah an tlawh bakah Vairengtea IOC Veng a kuhva kudam hmuhchhuah thar a bag 2000 lai kuhva ro dahkhawm pawh a hmunah an hmu bawk tih an sawi a.

Hetiang a kuhva man sa bag 5849 chuang a bo thei chu mak an tih thu leh Home Minister thusawi chuan Kuhva chungchangah hian Police te kutphuar a ni tih a chiang zualah an ngai tih an sawi a. “He kuhva rah ro man sa leh Police te pawhin an record fel vek ni si kudam atanga bag 5849 lakchhuah a ni hian Sawrkar hotu sang te leh Kuhva Smugglers te inzawmna nghehzia a tichiangin kan hria a, he thil sual lian tak chung-changa sawrkar chet vel dan hi a rinhlelhawm em em a ni,” an ti.

MNF Thalaite thuchhuah chuan, “A hmuna kala ngun taka kan chhui chian hnua kan thil hmuh-chhuah chu - Police te hian kuhva kudam a kuhva rah ro dan lova dahkhawm chungchangah pawh Criminal Complaint submit tha ngam lovin Sawrkar hotu liante mitmei an veng a, Tun thlengin Phaisena kuhva man sa chungchangah pawh Criminal Complaint submit ngam lovin Police te an awm niin kan hre bawk,” an ti a. Kuhva chingtute duh dan anga Kolasib District chhunga kuhva godown awm zawng zawng hi thiah vek nise an duh thu an sawi bawk.