Aug. 5 atangin YMA Volleyball

Zonuna Kawlni (LENKAWL) • August 1, 2024 • Comments • Mizoram

LBS Suzuki 23rd Inter Branch YMA Volleyball Tournament 2024 chu August 5, 2024 khian khelh tan a ni dawn a, Mipa-ah Team 73 leh Hmeichhia-ah Team 28 te an inel dawn a ni.

Central YMA buatsaih LBS Suzuki 23rd Inter Branch YMA Volleyball Tournament 2024 hi August 5 atanga 17, 2024 chhung hian Aizawl-ah khelh a ni dawn a, Mipa lamah Team 73 an tel dawn a, heng zingah hian Serchhip Sub-Hqrs. YMA huamchhung atangin Biate, Chhingchhip Venghlun, Hmuntha, Keitum, Khawbel, Thentlang leh Thenzawl Vengthlang Branch te an tel a. Hmeichhe inelna ah Team 28 telin Serchhip Sub-Hqrs. atangin Thenzawl Field Veng Branch te an tel bawk a ni.

Central YMA leh Mizoram Volleyball Association (MVA) te tangkawpin an buatsaih YMA Branch te Volleyball hmanga an inelna hi kum 1989 atang khan neih tan a ni a. Inelna hmasa ber hi Mipa Team te inelna bik niin YMA Brach 33 an tel a. Final-ah Bungzung leh Serchhip inhmachhawnin Bungzung hian hnehna changin YMA Volleyball intihsiakna a champion hmasa ber an ni.

Kum 1990-ah khan a tum hnihna atan inelna hi buatsaih leh niin hemi kum hian Hmeichhe Team inelna pawh neih tan a ni a, Bungkawn hnehtu Champhai chu Champion hmasa ber an ni thung a. Kum 2022 thleng khan Hmeichhe inelna hi vawi 21 buatsaih ni tawhin Mipa inelna hi vawi 16 buatsaih a ni tawh bawk a. Mipa inelna vawi 16 neih tawhah Hunthar chu hnuhma nei tha ber niin vawi thum an Champion bakah vawi nga lai pahnihna an ni a. Maubawk chu vawi thum bawk an Champion tawh bawk a ni. Hmeichhe lamah Kanan leh Bungkawn chu vawi sarih ve ve an Champion tawh bawk a ni.

Inter-Branch YMA Volleyball Tournament-ah hian Mipa inelna vawi 16 neih tawhah Branch pakua an champion tawh a. Chungte chu- Hunthar (2005, 2009 leh 2022), Maubawk (2007, 2014, 2016), Dawrpui Vengthar (1991, 1999), Bungzung (1989, 1993), Champhai (1990, 2004), Chanmari West (2001), Kulikawn (2012), Muanna Veng (2018) leh Ramhlun North (2006) te an ni.

Hmeichhe lama inelna vawi 21 neih tawhah champion thei Branch panga chiah an awm ve thung a. Chungte chu; Kanan (1995, 1998, 2002, 2005, 2008, 2009, 2016), Bungkawn (1999, 2000, 2001, 2012, 2014, 2018, 2022), Dawrpui Vengthar (1991, 2006, 2007), Electric Veng (2003, 2004) leh Champhai (1990, 1993) te an ni.