Mizoram-a ramsa leh an chenna ramngaw humhalh leh ven hi Mizoram mipuite mawhphurh a ni - Larsap

Mizoram Governor Dr. Hari Babu Kambhampati chuan, “Mizoram-a kan ramsa vang tak leh mang mai theih dinhmun a ding mek te leh an chenna ramngaw humhalhna leh ven hi Mizoram mipui te mawhphurhna a ni,” a ti.

‘Protect the Elusive’ tih thupuia hmanga ‘International Clouded Leopard Day’ puala inkhawm nimin-a Mizoram University Dept. of Education Conference Hall-a hun hman a hmanpuina ah Governor Dr. Hari Babu Kambhampati chuan Clouded Leopard (Kelrâl) chu ramsa vang tak a ni tih sawiin, “Mizoram in hetiang Ramsa kan la neih hi kan vannei hle a ni,” a ti a. Mizoram-a kan ramsa vang tak leh mang mai theih dinhmun a ding mek te leh an chenna ramngaw humhalhna leh ven chu Mizoram mipui te mawhphurhna a ni tih sawiin, “Kan ramngaw leh ramsa duhawm tak takte hi kan tu leh fa te tan I humhalh tlat ang u,” tiin kalkhawm te a sawm a ni. Larsap chuan, “Khawvel huap Kelrâl Ni, International Clouded Leopard Day kan hman mek lai hian kan rilruah Mizoram-a ramsa leh nungcha hrang hrang, humhalh lova mang mai theih dinhmuna ding mek te, an hlutzia leh humhalh an tulzia min hriattir se, an chenna ramngaw pawh ti chereuh mai lova, duat taka enkawl a, humhalh tlat turin kan nih zawkzia a tharin min hriat nawn tir leh rawh se,” a ti bawk.

Larsap Dr. Hari Babu Kambhampati chuan International Clouded Leopard Day pual hian Mizoram-a Kelrâl leh ramsa dang te, kan ramngaw, lui leh nungcha dang te humhalhna kawnga thawktu zawng zawng te hnenah lawmthu sawiin, tha thlah lova kan ramsa leh ramngaw te humhalhna kawnga thawk zel turin Mizoram mipui te a ngen bawk a ni.

International Clouded Leopard Day hi August 4-ah hman thin a ni a, kumin hian Pathianni a nih avangin nimin khan he ni pual hian hun hman a ni ta zawk a. International Clouded Leopard Day puala hun hman hi Zoological Department, Mizoram University te buatsaih niin, Society for the Preservation of Endangered Carnivores and their International Ecological Study (S.P.E.C.I.E.S) leh Riahrun Tours ten an sponsored a ni.

Nimin-a he hun hman ah hian Vice Chancellor MZU, Dean, School of Life Sciences, PCCF, EF&CC leh HoD, Department of Zoology ten thu an sawi bawk a. Larsap hian ‘Conservation of Clouded Leopard in Mizoram’ tih thupui hmanga Online Slogan Writing Competition buatsaih a lawmman dawngtute hnenah lawmman sem nghalin Joseph Lalchhanchhuaha chu pakhatna niin Mesak B. Laltlanchhuaha chu pahnihna leh H. Zothanpuia chu pathumna an ni bawk.