Kumin-ah August thla thlengin Mizoram-ah Police thi mi 77 chhinchhiah an ni
Home Minister K. Sapdanga chuan kumin ah August ni 3 thlengin Police thi 77 chhinchhiah an nih thu leh kum 50 hnuailam an ni tlangpui tih sawiin, Police-te chu taksa sawizawi bakah ei tur hrisel ei tam tur leh ruihhlo laka fihlim tum turin a chah bawk.
State pum huapa Mizoram Police-te hriselna leh Physical Fitness intuaitharna bultanna atana 'Train to Excel' tih thupui hmanga Fitness parade, '45 Minutes for All Ranks of Mizoram Police' tia vuah khuhhawnna nimin-a 1st Battalion MAP Playground, Armed Veng, Aizawl-a neih a hmanpuina ah Home Minister K. Sapdanga chuan Mizoram puma Police-te tana taksa sawizawi leh hriselna lam hawi hmalakna 'Fitness Parade' bultan a ni chu hmasawnna tura intuaitharna Mellung chhinchhiah reng tur a nih ngei a beisei thu a sawi a. Mizoram Police-te chu UT hunlai atang tawha hun rei tak chhung India ram Police-te zinga rinkai langsar leh hmingtha an lo nih tawh thin thu leh mipuite rinngam ni leh tura bultanna fitness parade, 'Train to Excel' thupui hmanga buatsaih chuan rahtha a chhuah ngei a beisei thu a sawi a. Rinngam-a hnathawk turin fitness tihpun a ngaih thu sawiin, kumin ah August ni 3 thlengin Police thi 77 chhinchhiah niin kum 50 hnuailam an ni tlangpui tih a sawi a, “In sun chhan ruihhlo leh a kaihhnawih natna do beihpui thlak a tul hle a ni,” a ti. Police-te chu Dan kengkawha mipui venghim tur an nih thu sawiin, “Rintlak ni turin khauh zawka kal a ngai a, hei hi ram leh mimal tana tha zawk tur a ni,” a ti a. Police-te chu taksa sawizawi bakah ei tur hrisel ei tam tur leh ruihhlo laka fihlim tum tura fuihin, Armed Branch lam bik tan Battalion tinte Parade leh Physical training regular taka neih chhunzawm tum turin a chah a, enzui a nih tur thu a sawi bawk.
Home Minister chuan kumin Favang-ah Police Sports buatsaih a nih tur thu leh tunhmain Police-te chu infiamna lama hmahruaitu an nih thin thu tarlangin, MPL Season hnuhnung bera Champion Mizoram Police Team-te chhuanawm a tih thu leh Infiammite'n fitness an neih that thu a sawi a, Police lak runpuiah infiammite'n mit an lak leh ngei a rin thu a sawi a. Unit tina Sports Cell din ngaihven a that bakah Arm Drill leh Firing lamte uar thar a tul thu a sawi a. International leh Inter-State ramri depa awm kan nih avangin venhimna kalpui uluk a pawimawh thu a sawi a, Police-te chu hmanraw hrang hrangte hmang thiam tura chahin Armed Battalion 8 te chu Commando Standard nei thei tura tanlak a tul thu a sawi bawk.
Thil tisualtu in dan hnuaia hremna a hmuh theih nan hnuchhui kawngah fimkhur taka hmalak a tul thu sawiin Home Minister chuan, Supervising Officer-te chu Case Investigating Officer-te hnaih taka vil reng turin a chah a. Criminal intelligence sang zelah hnuchhui nan Cyber Investigation System hman a ngaih avangin Cyber Crime Unit tam leh lian zawk din a ngaih dawn thu a sawi bawk.
Nimin-a he hun hman ah hian Mizoram DGP Anil Shukla IPS chuan kalkhawmte lawmna thu sawiin, 45 Minutes for all ranks of Mizoram Police programme chu Home Minister-in a ngaih pawimawh em em Police-te hriselna tura hmalakna pawimawh tak a nih thu a sawi a. Tunhnai kum 5 kalta chhungin chawhrualin kumtin Police 126 te'n chhan hrang hrang avanga nunna an chan thu tarlangin, thihna tam zawkte thlentu laka fihlim thei tura tanlak a ngai hle a ni, a ti a. Nitin minute 45 zel taksa insawizawi nana an hman phawt chuan taksa leh rilru hrisel an nei thei dawn a, duty pawh tha takin an hlenchhuak thei dawn tih a sawi a, “He programme hmang hian Mizoram Police hrisel, chak leh rintlak kan siam theih ka beisei,” a ti bawk.
Hemi hnu hian PT Master kaihhruaiin Physical Training Exercise neih chhunzawm a ni a. He hunah hian Senior Police Officer-te leh an hnuaia Police rank hrang hrang, an vaiin mi 500 vel an tel a ni.