Mizoram NGOCC ten Mizoram-a Gorkha te OBC pek leh IAF kut-a Airport hlan an duh lo

Mizoram-a Tlawmngai pawl hrang hrang intelkhawm, NGO Coordination Committee (NGOCC) hruaitute chuan Inrinni khan Aizawl-a Central YMA Office-ah chanchinbumite kawmin Mizoram-a Gorkhali-te Other Backward Class (OBC)-a dah an duh loh thu leh Lengpui Airport chu Indian Air Force (IAF) kuta hlan an duh loh thu an sawi.

Chanchinbu mite an kawmna ah hian NGOCC Chairman Lalhmachhuana chuan, “January 26, 1950 atanga Mizorama cheng Gorkhali hi mi 7,687 an awm mek a. Tuna Gorkhali-ten OBC-a puang tura sawrkar an nawr hi tha kan ti lo a. Central sawrkar hnuaiah chauh hna hauhsak an beisei nia sawi hi a khingbai a, nakin lawkah chuan State-ah an beisei leh ngei dawn a. Chuvangin, kaltlangpui lo turin sawrkar kan ngen a ni,” a ti a. Mizoram-a Gorkha awmte chu inpawh leh innel taka khawsa nimah ila, he OBC hi lo nei ta se nakin kum 10/20 hnuah kan tu leh fate tan a him dawnlo ni a a lan bakah, State sawrkara kan chanvo turte an hauh zel thei dawn ni a a lan avangin Central YMA leh NGO hrang hrang te chuan a himlo ah an ngai tih a sawi a. “A pawi hmaa inven mai hi a him a ni,” a ti bawk.

NGOCC Secretary Prof. Malsawmliana chuan Lengpui Airport chu IAF kuta hlan a nih chuan mipui tan harsatna hrang hrang a awm thei dawn tih sawiin, “IAF kutah awm ta se harsatna hrang hrang a thleng dawn a. Chung zingah chuan Airport leh a chhehvel hi 'Restricted Area' a ni nghal dawn a, mipui tan harsatna a thlen nghal dawn tihna a ni a. Chubakah IAF hian Flight Schedule an siam a ngai dawn a, khualzin phur thlawhna ai chuan anmahni thlawhna an ngai pawimawh ngei dawn a. Flight cancel a tam dawn bakah Additional Flight a har tawh dawn a. Chu mai bakah India ram hmun danga IAF enkawl Airport-te hian hma an sawn lem lo a. Sipai in an enkawl tawh chuan um chhuah leh an har dawn,” a ti.

Gorkhali-te OBC pek chungchang sawi bawkin Prof. Malsawmliana chuan, “State danga OBC-ten quota an neihah hian Central leh State-ah an nei kawp zel a. Gorkhali-te hian Central-ah chauh kan dil dawn ti mah se nakin lawkah chuan State-ah an la dil hi kan ring tlat a. Keini aia mihring chen tamna zawk leh Gorkhali tamna zawk Meghalaya, Nagaland leh Arunachal Pradesh te pawhin an pe lo a. Tribal State-a hnamdang quota lo pek leh chhawn hi a him tawk lo ah kan ngai a ni,” a ti bawk.

He hunah hian Mizoram Journalist Association President C. Lalrambuatsaiha chuana he inkohkhawm chungchangah hian Journalist te chuan tan lam nei emaw, ngaihdan sirtluk pui emaw nei thei an nilo tih sawiin, lai taka thlirtu tur mai an nih thu a sawi a, chutih rual erawh chuan kan ram leh hnam tana tha tura hmalakna ah mipui te zirtirtu tur an niin a puanzar hna chu an mawhphurhna a nih thu a sawi bawk.