Kum 2020-24 chhungin mahni intihlum 390 awm

Kum 2020 atanga kumin February inkar chhung khan Mizoram-ah mahni intihlum mi 390 an awm a, mahni intihlum zingah hmeichhia aiin mipa an tam zawk.

Mizoram Police chhinchhiah danin, tunhnai kum nga (2020-24) chhunga mahni intihlum mi 390 zinga mi 332-te chu mipa an ni a, mi dang 58-te chu hmeichhia an ni a, mipa an tam fal hle a. Mahni intihlumna hi kum 20 atanga kum 39 inkarah a tam ber bawk. Kum 2020 khan Mizoram-ah mahni intihlum mi 99 an awm a, heng zinga 84 hi mipa niin hmeichhia 16 an awm a. Kum 2021-ah mahni intihlum 67 awm lehin mipa 59 leh hmeichhia 8 an ni a. Kum 2022 khan Mizoram-ah mahni intihlum hi mi 125 awmin heng zinga 104 hi mipa an ni a, hmeichhia intihlum 21 an awm bawk. Kum 2023-ah mahni intihlum 81 an awm a, mipa 69 leh hmeichhia 12 an ni a. Kumin 2024-ah February thleng khan Mizoram-ah mahni intihlum chhinchhiah 18 awmin mipa 17 leh hmeichhia pakhat an ni a. August thla kal mek thlengin hei aia tam hi mahni intihlum an awm tura ngaih a ni.

Mi thiamte chuan mahni intihhlum duhna chu rilru lam harsatna a nih avangin kum bithliah a awm lo tih an sawi a, mi tin chungah a thleng thei niin an sawi a. “Hetiang harsatna neite hian an harsatna hriatthiampuitu an mamawh a, an lakah dawhtheihna kan neih a ngai thin. Hei vang hian health lama thawktute, an thian leh an chhung leh khatten hriatthiamna thuk zawk kan neih a ngai,” an ti bawk.