Kumin-ah Hnahlan leh Champhai-a Grape chingtu ten Grape an thar tam dawn lo niin an sawi

Mizorama Grape chhinna hmun, khawchhak lama Hnahlan leh Champhai chhehvelah kumin hian beisei angin Grape an thar tam dawn lo niin an sawi a. Hetihlai hian Hnahlan leh Champhai Winery-te chuan kuthnathawktute Grape an lei sak mek a ni.

Grape Growers Society hruaitute hnen atanga thudawn danin beisei angin kumin hian Grape thar hi a tha dawn lo niin an sawi a. Grape thar a that loh chhan hi Cyclone Remal-in a nuai vang leh rial-in a den nasat vang nia an hriat thu an sawi a. Hnahlan Winery chuan kuthnathawktute Grape rah quintal 800 an lei tawh a, a dahthatna lamah harsatna an neih deuh avangin Zirtawpni leh Inrinni khan Grape hi an lei lova, vawiin hian lei chhunzawm leh an tum a ni. Champhai Winery chuan Zirtawpni tlai thleng khan Grape hi quintal 694 an lei tawh a. Hnahlan Grape Growers & Processing Cooperative Society hian kumin hian Grape rah hi quintal 1,000 vel lak theih an beisei a, hetihlai hian Champhai Grape Growers Society chuan quintal 1,200 vel lei theih an beisei thung a ni.

Hnahlan Grape Growers & Processing Cooperative Society hian July 17, 2024 atang khan kuthnathawkte Grape hi an lei tan a. Grape hi winery-ah kg. khat Rs. 60 zela leiin a theih chin chinah Grape man hi pek tlak (payment) nghal zel a ni a. Champhai Grape Growers Society hian July 9, 2024 atang khan Grape hi an lei tan a, Grape hi loneitute huanah kg. khat Rs. 44 hisapin an leisak a, Winery-ah chuan kg-ah Rs. 60-in an lei niin an sawi bawk.

Champhai Winery hian wine hi chi thum an siam a, chungte chu Champwine, Champwine Premium leh Sacramental Wine te an ni a. Champwine hi 750ml niin bottle khat Rs. 225-in an hralhchhuak a, Champwine Premium hi 375ml niin um khat Rs.112.5-in an pechhuak thung a. Sacramental Wine hi um khat Rs. 200-in an hralhchhuak thin bawk a ni.

Hnahlan Winery hian Grape atang hian Isabella siamchhuakin um khat 750ml niin Rs. 350-in a zuarchhawngte hnenah an pe a. Isabella hi Rs. 500-in an zuar thung a. Champhai Grape Growers Society hian Wine an siam bakah RR Sales, Delhi leh Baptist Church of Mizoram (BCM) te hnenah an hralh thin a. Hnahlan Winery erawh chuan Isabella bak hmun danga hralh an nei lo thung.

Excise & Narcotics Department chuan Hnahlan leh Champhai Winery atanga Grape siamchhuah hralh tur hian mi 53 hnenah phalna (vendor licence) an pe a, hengte hi mimal sumdawng 51, Corporation leh Club pakhat ve ve an ni a. Licence nei zinga mi 34-te chuan tha takin an zuar mek a, an zinga 19-te erawh an chawl rih thung a. Heng chawlrih te hi engemaw harsatna avanga permit la tinung leh lote niin an Permit hi cancel tihna a ni lo niin Excise & Narcotics Department-a thawktute chuan an sawi a ni.