Lirthei neitu ten an hmalakna kaltlangpui an tum

Kolasib District a lirthei enkawltu pawl hrang hrang ten Mizoram chak lakna kawngpui enkawltu NHIDCL leh an hnuaia Contractor in kawngpui an ngaihthah avanga Vawiin, August ni 22, 2024 (Ningani) zing dar 10:00 atanga Mizoram luhka National Highway-6 a lirthei tlan lo tura lirthei khalhtu te an ngenna chu kaltlangpui an tum tih an sawi.

Tarlan tawh angin, Kolasib District chhunga Lirthei enkawltu pawl hrang hrangte chuan Kolasib District chhunga kawngpui te chu Mizoram ei leh bar lakluhna kawngpui ber a ni chungin he kawngpui enkawltu te hian hun rei tak an ngaihthah avangin tunah chuan lirthei tlan ngam loh khawpin a chhe tawh niin an sawi a. Hetianga kawngpui enkawltu ten kan kawngpui te an hlamchhiah avang hian Vawiin, August 22, 2024 chawhma dar 10:00 atangin tiamchin awm lovin lirthei eng chi mahin kawngpui zawh lo tura an ngen thu thuchhuah an siam bakah thuthar theh-darhtute kawmin an lo sawi tawh a.NHIDCL leh a hnuaia Contractor te pawh August thla ralhma ngeia Kolasib District atanga in lachhuak tur leh an aiawh Contrator, hna thawk thei tur dah thuai turin Mizoram sawrkar an ngen a ni.

Hetihlai hian Kolasib District Bawrhsap Robert C Lalhmangaiha chuan Lirthei enkawltute hi an hmalak tum dan chu mipui harsatna thlen thei anih avangin ti lo turin a lo ngen tawh a, hetihrual hian he kawngpui enkawltu NHIDCL leh an hnuaia Contractor te pawh he kawngpui a lirthei veivak leh mipui ten harsatna an tawh loh nan kawngpui siam hna chu thawk nghal turin leh chak taka hma la turin a lo hriattir tawh bawk. 

Hetihlai hian NHIDCL Gen. Manager Pranab Sinha chuan an hnuaia contractor C Lalhluna, Ramhlun Veng Aizawl chu a hna chan chhunga kawng chhiain mipui tan harsatna nasa tak a thlen avangin ni 15 chhunga siamtha vek turin nimin khan hriattirna a tichhuak ve bawk a ni.