Kum 2022 hnu lamah tang tlanchhuak 56 awm

Zonuna Kawlni (LENKAWL) • August 22, 2024 • Comments • Mizoram

Home Minister K. Sapdanga’n kum 2022 atanga kumin inkarah Mizoram-ah Jail tang tlanchhuak mi 56 an awm thu sawiin, heng zingah hian man leh mi 25 awmin mi 31 erawh man an la ni lo tih a sawi.

Ni hnih awh Mizoram Assembly Session thutkhawma zawhna ziaka a chhanna ah Home Minister K. Sapdanga chuan tun dinhmunah Mizoram Jail hrang hrangah tang mi 1807 an awm mek thu sawiin, Aizawl Central Jail bakah District Jail hrang hrang 7 te chu thawmthat tura hmalak mek a nih thu a sawi a. Home Minister chhanna atanga lan danin kum 2022 atanga kumin thlenga Mizoram-a Jail tang mi 56 tlanchhuak zingah hian Jail atanga tlanchhuak mi 33 an awm a, Court atanga tlanchhuak 7 awmin Damdawi In atanga tlanchhuak 8 an awm a, Police motor atanga tlanchhuak 7 leh Prison Ambulance atanga tlanchhuak pakhat an awm bawk.

Sawrkar chhinchhiah danin kum 2022-ah tang tlanchhuak mi 17 awmin Aizawl District atangin mi 11, Champhai atangin mi 3 leh Lunglei atangin mi 2 an awm a, Siaha District atangin tlanchhuak pakhat a awm bawk. Nikum 2023-ah tang tlanchhuak 29 awmin Aizawl District Jail-ah tlanchhuak 7 an awm a, Lunglei District Jail-ah mi 6 awmin Serchhip leh Champhai District Jail-ah te 3 ve ve an tlanchhuak a, Siaha District Jail-ah 5 tlanchhuakin Kolasib leh Lawngtlai District Jail-ah tlanchhuak pakhat ve ve an tlanchhuak a, Women’s Jail Aizawl atangin 3 an tlanchhuak bawk a ni.

Kuminah tun thla, August thla thlenga sawrkar chhinchhiah danin tang tlanchhuak mi 10 an awm tawh a, tlanchhuak te hi Aizawl District Jail atangin 7 awmin Serchhip District Jail atangin 2 an awm a, Kolasib District Jail atangin pakhat a tlanchhuak tawh bawk a ni.

Kum 2022 atanga kum 2024 inkara Jail tang tlanchhuak zingah hian Aizawl District atanga tlanchhuak mi 8 te chu man an ni tawh a, Siaha atangin mi 6 man niin Lunglei ttanga tlanchhuak mi 3 man ni a, Champhai, Serchhip leh Women’s Jail atanga tlanchhuak mi 2 theuh man tawh niin Lawngtlai leh Kolasib atanga tlanchhuak mi pakhat ve ve man an ni tawh a, an vaiin mi 25 man ni tawh a ni.