Kumin hian Fur ruahtui tla a tam niin a lang

Kumin hian Mizoram-ah Fur ruahtui a tla tha rih hle nia hriat a ni a, chhinchhiahna atanga a lan danin kum hmasa te aiin kumin hian ruahtui tla hi a tam a ni.

State Meteorological Centre-in an chhinchhiah danin, kumin ah July ni 31 thleng khan Mizoram-ah ruah hi mm 1369 a sur a, nikum khan January ni 1 atanga July ni 31 thlengin mm 951.6 a sur thung a. Nikum leh kumin-a thla sarih chhunga ruahtui tla zat hi a intam hleih hle a ni. Chhinchhiahna atanga a lan danin kumin hian May thla atang khan ruah hi a la sur deuh char char a ni ber a; May thla ah khan mm 519 a sur a, kumdang-a May thla ah hetianga tam hi a la sur ngai lo niin kan thu lakna chuan a tarlang a, kumin hian June thla ah ruahtui mm 353.7 a tla a, hei hi tam viau mah se nikum June thla a ruahtui tla mm 381.7 aiin a tlem zawk thung a. Thla liamta July thla chhunga ruah tui tla zat chu mm 358.5 a ni a, nikum July thlaah khan mm 291 a tla thung a, kumin hian July thla ah ruahtui tla hi a tam zawk a ni.

Kumin hian May thla ah ni khat-a ruah sur tam vak a awm laiin July thla ah erawh ni khata tam tham taka sur awm lem lo niin a lang a, tam vak lovin ruah erawh a sur deuh reng ve thung a. July ni 1-ah khan mm 84.2 a tla a, ni 2-ah mm 79 a tla lehin heng bak chu tam lutuk a awm lo a ni. Kumin July thla ah ruah a sur deuh reng avang hian boruak pawh a vawng dai niin a lang a, July thlaah a lum ber laiin 30°C a ni a, chu pawh chu vawi 2/1 chauh a ni bawk.