Civil Hospital Aizawl-ah thisen mamawhna a sang

Mizoram-a Blood Bank lian ber, Civil Hospital, Aizawl-ah thisen mamawhna a sang hle reng a, ni khata thisen an mamawh zat chu Unit 80-100 vel a tling.

Civil Hospital, Aizawl Blood Bank-a Head of Department (HoD) Dr. K. Rothangpuia sawi danin, Civil Hospital, Aizawl hi Mizoram-a Blood Bank lian ber niin, Aizawl khawpui chhunga damdawi In zawng zawng deuhthaw-in an mamawh ang zelin an hnen atangin thisen an la thin a, hei vang hian thisen mamawhna a sang hle reng thin a. Civil Hospital, Aizawl Blood Bank-in ni khata thisen a mamawh (an pekchhuah) zat chu unit 80-100 vel a tling tih sawiin, Blood Bank-ah thisen neih tlem deuh chang an neih thin avangin thawktute tana thlaphanawm rum rum chang a awm fo thin niin a sawi a. “Duhthusam ah chuan unit 200 bawr vel awm reng thei se duhthusam a ni a, mimal inpete bakah, pawl (college, NGO, kohhran thalai) anga thisen pek kan intihhmuh chho zel a, hei hian nasa takin thisen mamawh a phuhruk thin,” a ti bawk.

Dr. K. Rothangpuia chuan Health Minister Lalrinpuii hmalakna in thisen var lakna khawl lei tum mek a ni tih sawiin, hei hi a hlawhtlin hunah chuan a tangkai dawn hle niin a sawi bawk.

Mizoram State AIDS Control Society (MSACS) chhinchhiah danin Financial year 2023-24 chhung khan Mizoram-ah Thisen Unit 35,619 pek a ni a, chung zinga 32,493 chu a thlawna pek (voluntary donation) niin 91.22% a tling a ni.