Mizoram-ah kumin chhungin Heroin kg. 89.317 manin ruihhlo hmansual vangin mi 44 an thi tawh

Kumin January atanga July thla tawp (thla 7) chhung khan Mizoram Police leh Excise and Narcotics Department-a hnathawkte chuan Heroin kg. 89 leh gram 317 bakah methamphetamine kg. 335 leh gram 605 an man a. Ruihhlo hmansual avanga thi pawh Mizoram-ah mi 44 an awm tawh bawk a ni.

Mizoram Police leh Excise and Narcotics Department hotute sawi danin Police hian kumin-a thla sarin chhung hian Heroin kg. 57 leh gram 126 bakah Methamphetamine kg. 223 leh gram 77 manin hemi hun chhung vek hian Excise and Narcotics Department hnathawkte'n Heroin kg. 32 leh gram 191 leh Methamphetamine kg. 112 leh gram 528 an man bawk a. Mizoram Police te hian hemi hun chhung hian Ganja kg. 264.66 manin END hnathawk ten kg. 436.88 an man a, Department pahnih man belhkhawm hi kg. 682.154 a ni. Police hian tun thla 7 kalta chhung vek khan Crystal Meth kg. 35.155 manin END te hian kumin ah chuan man an la nei lova. Police-in kg. 35 chuang an man hi cheng vbc. 105.46 hu niin an sawi a, Crystal Meth hralhna rate hi a to hle a, a mum a an hralh Methamphetamine aiin a let tam takin a to niin an sawi a ni. Police hotute chuan tun thla 7 kalta chhunga Heroin an man hi cheng vbc. 17.14 hu nia sawiin, Methamphetamine an man hi cheng nuai 29 hu niin an sawi a. Ruihhlo kaihhnawih bikah thubuai 236 ziaklutin mi 312 an man a, Heroin chungchang bikah thubuai 207 ziaklutin mi 276 an man bawk a ni.

Hetihlai hian Excise and Narcotics Department-in an chhinchhiah danin kumin January leh July thla tawp inkar chhung khan ruihhlo hmansual avangin Mizoram-ah mi 44 an thi tawh a, heng mitthi te hi mipa 37 leh hmeichhia 7 an ni a, an vai hian Heroin emaw, Heroin leh damdawi dang khawih kawp emaw vek an ni. Kum 1984 khan Mizoram-ah Heroin khawih mi pakhat thiin hei hi Mizoram-a Heroin hmansual avanga thi chhin-chhiah hmasak ber a ni a, khami atanga kumin July ni 31 thleng khan ruihhlo vanga thi hi mi 1,854 an tling tawh a, an zinga 1,628 hi mipa an ni a, hmeichhia 226 an tel bawk. 

Kum 2004 kha Mizoram-a ruihhlo vanga nunna chan tam ber kum niin mipa 122 leh hmeichhia 21, an vaiin mi 143 an thi a. Kum 1984-a ruihhlo vanga thi chhinchhiah hmasak ber atanga tun thleng hian kum 1986-ah chiah kha ruihhlo vanga thi chhinchhiah awm loh kum ala ni.