Chhiatna thleng thei laka fimkhur turin chah
Hemi chungchanga Serchhip District Bawrhsap leh District Disaster Management Authority-a Chairman Paul L. Khuma’n nimin-a hriattirna tichhuaka a tarlan danin August 3, 2024-a India Meteorological Centre, Govt. of India in Bulletin a tihchhuah angin Mizoram hmun thenkhat ah Vawiin, August 5, 2024 atanga August 7 chhung hian ruah nasa taka sur thei a nih thu leh Serchhip District pawh he ruahsur tur hi dawng ve thei dinhmunah kan ding a; mipuite chu chi-ai lo tur leh Village Disaster Management Committee te pawh chhiatna thleng thei lakah lo in ring lawk turin a hriattir a. Mipuite pawh ruahsur nasa avanga chhiatna thleng thut thei laka fimkhur turin a chah a ni.
Hei bakah hian Bawrhsap thuchhuah chuan Mahni In leh lo te ruahsur nasa a dawl theih nan a tul anga thawmthat ngai laite thawmtha tur te; Tui paihna leh tui luankawr te mumal taka siam tur leh Ruahsur avanga leimin thei lai te hriat chiana fimkhur turin a chah a. Tui hmun, lui leh ramhnuai-ah te kal loh a that thu te; Ruah vanga eng (Power supply) neih loh theih anih avangin electric hmang thil te charge lawk theih a piang charge lawk a that thu te chahin; Chhiatna a lo thlenin Serchhip District Emergency Operation Centre (DEOC) No. 9862116104 emaw, Zonal Officer te hnenah a rang thei ang bera hriattir tur a nih thu te a tarlang bawk a ni.