Kum chanve chhungin Serchhip District-ah Rannung seh natna kai mi 901 zet hmuh an ni tawh

Serchhip District-ah kumin hian Rannung seh natna, Scrub Typhus kai an tam hle a, kumin January thla atanga June thla tawp thleng khan Scrub Typhus kai mi 901 zet hmuhchhuah niin mi pahnih in an thihpui tawh a, Serchhip khua atangin he natna kai hi mi 334 zet hmuh an ni bawk.

Serchhip CMO Office-a IDSP-a thawktute hnen atanga LENKAWL in thu a dawn danin kumin January atanga June thla tawp thleng khan Serchhip District-a mi 3880 te enfiahna atangin Scrub Typhus kai hi mi 901 zet hmuhchhuah an ni a, January atanga June thla tawp thleng khan ni 182 awmin nitin hri kai mi 4.95 hmuchhuak ang an ni a, Sample enfiah zawng zawng atanga chhutin za zela 23.22 te chuan Scrub Typhus hi an kai bawk a ni. Kumin hian January thla ah Scrub Typhus kai hi mi 143 hmuhchhuah niin February thla ah 161 hmuh leh an ni a, March thla ah mi 151 hmuh niin April thla ah mi 136, May thla ah mi 152 leh June thla ah mi 155 hmuh an ni bawk a, kumin chhung hian Scrud Typhus kai zingah mi pahnih boral awmin North Mualcheng khua leh Chhiahtlang khuaa mi pakhat ve ve te an ni. Hei bakah hian thla liamta July thla chhung khan Sample 1156 enfiah ni bawkin heng atang hian Scrub Typhus kai mi 293 hmuh an ni bawk a, heng te nen hian kumin January thla atanga July thla tawp thleng khan Serchhip District-a Sample enfiah 5036 atangin Scrub Typhus kai mi 1194 hmuhchhuah an ni.

Rannung seh natna kan tih mai,Scrub Typhus hi Orientia tsutsugamushi natna hrik in mihring-a natna a thlen a ni a, he natna hi Tuhrik, Scrub Typhus natna hrik pai in mi a seh atanga ni 10-12 chhungin a langchhuak thin a. Mizoram-a Sazu te enfahna neih tawh ah pawh he natna hrik hi hmuhchhuah an ni. He natna hi Tlun/khur leh khawsik, nasa taka luna, mit vel sen remrum, Thalthoh leh hnungzang vela thak bawl angte in a rawn langchhuak thin a. Achang chuan tihrawl leh pumna te pawh a thlen bawk a, a nasat phei chuan thisenzam chat te leh thisenzam block te a thlen thei a,Pneumonia leh thawkna lama harsatn ate pawh a thlen thei bawk a ni. Scrub Typhus natna hi thisen exam atangin a hmuhchhuah theih a, Mizoram-ah hian Rapid Diagnostic Kits (ICT) te hi he natna hriatchhuah nana an hman ber a ni a, WHO leh Health Ministry lam chuan ELISA hmanga test hi an recommend thung a ni.

Serchhip District chhungah hian kumin kum chanve (January-June thla) chhung hian Typhoid vei pawh mi 90 lai hmuhchhuah an ni bawk a, heng mite hi thisen enfiah 1656 atang hmuh te niin mi 446 te thisen enfiahna atangin Dengue kai mi 33 hmuhchhuah an ni bawk a, mi 810 te thisen enfiah atangin Malaria kai mi 5 hmuh ni bawkin Chikungunya leh Leptospirosis kai erawh Sample enfiah atangin hmuh an awm lo thung a ni.