Chief Minister in Union Home Minister, DoNER Minister leh sawrkar mi pawimawh te a kawm

Chief Minister Lalduhoma chuan niminpiah tlai khan Union Home Minister Amit Shah, DoNER Minister Jyotiraditya Scindia leh mi pawimawh dangte New Delhi-ah a kawm a. Aizawl-a Sipai sawnchhuah chungchang ah Ministry atanga officer lian a rawn tirh tur thu Home Minister hian a sawi a ni.

Home Minister Amit Shah nen an inkawmna ah Chief Minister Lalduhoma chuan sawrkar laipui in tunhnaia raltlan (displaced persons) te tana Mizoram sawrkar cheng vbc. 10 a rawn pek avangin lawmthu a sawi a. Manipur harsatna tawh thuah Home Ministry leh Manipur tlangmi mipuite aiawh ITLF hruaitute chuan inbiakna nei thei se thaa a hriat thu a sawi a. Manipur Chief Minister Biren Singh-a’n Imphal-a zin tura a sawm thu pawh Amit Shah hi hrilhin tihhlawhtlinsak a duh thu pawh a sawi a ni. Assam Rifle sawnchhuah chungchang pawh sawiin, Assam Rifle lamin an MoU tur an peih har avanga hmalakna a khawtlai tak thu sawlan a ni a. Home Minister hian, “Ministry atangin Officer lian pahnih ka rawn tir anga, anni hovin Aizawl-ah AR lam te nen lo sawidun leh ula,” tiin hmalak zel dan tur a ruahmanna a lo hrilh a. A tahtawla an chhuah phei a tul tur thu pawh a sawi a. Chief Minister hian Assam Rifle leh Mizoram sawrkar ngaihdan inhmu rem lo lai te a awm anih chuan inpawh taka sawiho an inpeih thu a hrilh ve bawk. Home Minister Amit Shah hian Cyclone Remal tuartute endika rawn kal Special Team te report chu Finance lamah a la awm thu leh a rang lamin an lo ngaihven tur thu sawiin, “Chhawmdawlna sum pawh engemawzat kan rawn pe ang che u,” tiin Chief Minister hi a lo hrilh a ni.

Chief Minister hian DoNER Minister Jyotiraditya Scindia nena an inkawmnaah Serchhip District Hospital sak dan tur te, Mizoram-a Oil Palm chingtute chungchang leh Ministry of DoNER hnuaia Mizoram in Pending Projects a neih chungchang te an sawi a. Oil Palm chingtuten hlawk zawka an thar theih nan Mizoram-ah Samadhan Centre dah ve nise, Huan neitute mamawh tui, leitha leh Link Road te titha ila, tuna an thar mek dan Hectare khata Metric Ton 7 atanga Metric Ton 15 vel tal an thar chhoh theih dan tur dappui nise an ti a. Bukvannei-a Oil Palm herna khawl chu an Oil herchhuah phurhthlakna a thui tham avangin 'hloh' zelin an la kal nia sawi a ni a. Awmze nei zawka a kal theih nan Mizoram-ah Refinery hi din law law nise thaa an hriat thu pawh an sawi a ni.

Tuna hian DoNER Ministry-ah Mizoram in a thehluh project inchiah (pending) mek 93 a awm thu leh heng atana sum ruahman zat chu cheng vbc. 1716 vel anih thu te, project inchiah rei zual te phei chu kum 24 a upa a nih tawh thute DoNER Minister hian Chief Minister hi a lo hrilh a. “Project inchiah rei tawh tam tak, Vawiin-a han kalpui atana fuh tawh lo te hi project tharin rawn thlak ula, ka lo pawmsak ang che u,” a ti bawk a ni.

Chief Minister hian nizan hmasa khan Mizoram House-ah Tapan Deka, Director, IB chuan kawmin JICA hotute leh KMMTTP Contractor te koin an hnathawh te a sawipui bawk.