Serchhip DC Office-ah Digital File Tracking System

Serchhip District Bawrhsap Paul L. Khuma chuan nimin, August 1, 2024 atang khan Serchhip DC Office-ah Digital File Tracking System hman tan a nih thu a sawi.

Serchhip DC Office in ‘Best Online Initiatives Award 2024’ a dawn lawmna nimin-a Serchhip DC Conference Hall-a neih ah District Bawrhsap Paul L. Khuma chuan August 1, 2024 atangin Serchhip DC Office-ah ‘Digital File Tracking System’ hman tan nghal a nih tur thu hi puangin, Office chhunga File chevel a ran zawkna tur te, chhui a awlsam zawkna tur leh file te mumal taka vawn a nih theih nan DFTS hman a nih tur thu a sawi a ni. District Bawrhsap Paul L. Khuma chuan Serchhip DC Office in DC Online kaltlanga mipui rawngbawlna hna an thawhthat avangin ‘Best Online Initiatives Award 2024’ Award an dawn avanga lawmthu sawiin, thawktute inpekna vang a nih thu a sawi a. Mahni hna chanpual theuh thahnemngai taka thawk zel turin a fuih bawk.

Mizoram sawrkar-a Information Communication Technology Department buatsaihin July 24, 2024 khan IT hmang tangkai Department leh Office te hnenah Chief Minister Lalduhoma chuan ‘Government Online Excellence Awards, 2024’ a sem a. Award Category hrang hrang zingah Serchhip District chuan DC Online kaltlanga mipui rawngbawlna hna an thawhthat avangin ‘Best Online Initiatives Award 2024’ an dawng a, Serchhip DC Paul L.Khuma chuan Serchhip District aiawhin he Award hi a dawng a. Nimin a he Award dawn lawmna hun hi Addl. DC Lalrinzuala chuan kaihruaiin SDO (Sadar) Rebecca Laldinmawii Hrahsel chuan Report a pe a, DC Office-a Staff zawng zawngte he hunah hian telin Infuihtharna hun hman nghal a ni.