Kum 2023-ah TB vei 2013 hmuin mi 108 in an thi

National Health Mission hnuai National TB Elimination Progamme ( NTEP) chhinchhiah danin nikum (2023) khan Mizoram-ah TB rinhlelh mi 17,432 test zingah mi 2,013 ten TB an vei a, heng zingah hian zaa 86 enkawl dam niin mi 108-in an thihpui.

Ram puma TB natna umbo beihpui thlakna kal zelah Mizoram-ah pawh chak taka hmalak a ni a; kum 2025 ralhma ngeia TB natna um bo tumin sawrkarin theihtawp a chhuah a, a tam thei ang ber TB test an nih a, TB vei ten enkawlna tha zawk an dawn theih nan theihtawp a chhuah a ni. National Health Mission hnuai National TB Elimination Progamme chuan TB vei an tlem zel theih nan Mizoram hmun hrang hrangah hma a la mek a. District tina damdawi In leh Health and Wellness Centre hrang hrang te thuamchakin TB chu hmuhchhuaha enkawl an nih theih nan thawktu pawh nasa takin a thuamchak a, sawrkar damdawi In, CHC leh PHC-ah te a thlawnin TB a in-test theih bakah TB vei te tan a thlawnin damdawi a sem chhuak bawk.

Sawrkar laipui hmalakna Pradhan Mantri TB Mukt Bharat Abhiyaan hnuaiah sawrkar chuan TB damlo ten TB natna an vei chhunga an ei leh in tih that nan an Bank Account-ah thla tin Rs. 500 a pe thin a, heng bakah hian mi inpe te nena thawkhoin TB vei enkawlna kawngah hma a la a, TB natna hi India ram atangin kum 2025 ralhma ngeiin umbo tum a ni a. Sustainable Development Goals 2030 thil tum zul zuiin ramdang tam zawk chuan kum 2030-ah TB hi umbo an tum a, Mizoram-ah erawh kum 2025-ah umbo tum niin hmun hrang hrangah mi tam zawk dinhmun hrechianga enkawl an nih theih nan sawrkarin chak takin hma a la mek a ni.