ZPM Party in MNF Legislature Party chu thu dik tawklo pholangtu ah an puh

ZPM Party chuan MNF Legislature Party chu Press Conference hmanga Zoram mipuite hriata thu dik tawk lo pholangtu ah puhin, pawi an tih thu an sawi.

Inrinni-a thuchhuah an siamah ZPM Party chuan Buhfai man chungchang tunhnaia sawi chungchang sawifiahin, Sawrkâr tharah politician inrawlh lohna State Purchasing Advisory Board (SPAB) kaltlanga Chief Secretary hova buhfai supply-tu thlan a ni chu kalphung thar sawrkâr rah chhuah nia an hriat thu leh lawmawm an tih thu an sawi a. “Hetihlai hian, sawrkâr hmasa-ah ni 2.5.2023 khan SPAB kaltlang lovin, Chief Minister thu hmuin dan lovin buhfai supply-na man uchuaka taka tihsan a ni a, buhfai hi quintal-ah Rs 3,025/- atangin Rs 3,400/- ah tihsan a ni a, Chief Minister-in a duhsak zâwngte dan lova buhfai supply-na man a tihsân sak avânga sawrkârin sum a chawibelhna chu quintal-ah Rs ,375/- lai a ni,” an ti.

ZPM Party chuan MNF MLA-te'n buhfai man tihsân chungchânga sawrkâr demna thu an auchhuahpui chu ram hruaina kawngah a rilru mumal neih loh thlâk an tih thu sawiin, “MNF sawrkâr hnuaiah buhfai man tihsânna tur hian Committee hial lo din tawh niin, Deputy Chief Minister kaihhruaina hnuaiah 'Committee on matters relating to Non-NFSA Act 2013 (Above Proverty Line) benefeciaries and revision of issue price of non NFSA rice' din niin, he Committee ni 17.1.2022-a thukhawm chuan, Card var Ration Buhfai man tihpun chu an lo pass daih tawh zawk a, an Meeting minute pawh en theihin a awm a ni,” an ti bawk.

Tunhnaia Phuldungsei khuaa mi thenkhat Ration Card paihsak chungchang pawh ZPM chuan sawifiahin, “ India sawrkarin End to End Computerisation of Targeted Public Distribution System (TPDS) kalpuiin, he Scheme-in Management System hran a hman, Ration Card Management System hi Adhaar Card hmanga finfiah ngai a nih avângin Adhaar pakhat hi Ration Card pakhatah chauh chhinchhiah theih a ni a, hei vâng hian Phuldungsei-a mi thenkhat Ration Card chu Tripura lamah lo register tawh anih avângin RCMS khawl hmanga chhinchhiah theih an ni lo zawk a ni,” an ti a. “Hnam inpumkhatna hi ZPM kaihhruai sawrkârin a ngaih pawimawh êm êm a, Mizoram chhûng leh pawna Zofate inpumkhatna tur hi ZPM kaihhruai sawrkârin mut mawh hnar mawha a neih mek a ni,” an ti a. Thu belhchian dawl lo hmanga inpuh chu politics kalphung hlui a nih avângin Zoram mipuite'n an nin tawh thu leh Zoram-ah kalphung thar, Mipui Sawrkâr a lo pian phah tih an sawi a. Opposition party-te chu thu dik tawklo hmanga mipui rilru kawih her tumna bansan a, thil tha tih kawnga inelpui atâna sawmin, “Kan ram rorelna-ah Pathian ram tundin-a a awm theihna turin dikna leh rinawmna nen ZPM Party chu huaisen takin a kal zel dawn a ni,” an ti bawk.