Mizoram-ah raltlan rawn lut 44,689 awmin a tam zawk chu rampawn atanga rawn lut an ni

Tun dinhmunah Mizoram-ah State pawn leh rampawn atanga raltlan rawn lut mi 45,000 dawn an awm mek a, heng zinga a tam zawk chu rampawn atanga himna zawnga Mizoram-a rawn lut niin India ramchhung State dang atanga rawn lut mi sing khat dawn an awm bawk.

Sawrkar chhinchhiah dan thar bera a lan danin Mizoram-ah hian State pawn leh rampawn atanga raltlan rawn lut mi 44,689 an awm mek a, an zinga 35,738 chu rampawn, Myanmar leh Bangladesh atanga raltlan rawn lut te niin midang 8951 te chu India ramchhung State dang atanga rawn lut an ni. Tun dinhmunah Mizoram-ah Myanmar atanga raltlante mi 33,724 an awm mek a, an zinga 10,800 chu hmeichhia niin mipa 10,159 an awm bawk a, naupang 12,765 an awm bawk a ni. Myanmar atanga Mizoram-a raltlan rawn lut zinga 16,979-te hi an puala sak Relief Camp 129-ah awm mekin mi 16,755-te erawh chuan an chhungte leh thiante an belh bakah mahni a In luahte leh mi hnuaia Thlam-a awm te an ni.

Myanmar atanga raltlan rawn lutte hi February ni 1, 2021-a Sipai-in thuneihna an hnehchhuh hnu atanga rawn lut tan, tualchhung indona avanga rawn luh belh ta zel an ni a, Mizoram District tinah an awm a ni. Champhai District-ah raltlan rawn lut tam berin mi 13,966 an awm a, Siaha District-in dawtin mi 5,953 an awm a, Lawngtlai District-ah mi 5,922 an awm bawk a ni.

Heng bakah hian Mizoram-ah hian Bangladesh Chittagong Hill Tracts atanga sahimna zawnga raltlan lo lut mi 2,014 an awm mek bawk a. Bangladesh atanga rawn raltlante hi District dangah awm lovin Lawngtlai District-ah chauh an awm a ni. Anni hi Chittagong Hill Tracts-a cheng Zofate tana thuneihna sang zawk ngiata ralthuam lektu Kuki-Chin National Army (KNA) leh Bangladesh sipaite inkah fo avanga rawn raltlan an ni.

Mizoram thenawm Manipur-a nikum May ni 3 atanga Meitei leh Zofate inchemharna avanga Mizoram-a rawn raltlante pawh hriat theih hnuhnung berah mi 8,951 an awm a, District 9-ah an awm a. An zinga mi 1,294 te hi Aizawl, Kolasib leh Saitual District-a an puala siam Relief Camp 23-ah khawsa-in mi 7,657 te erawh chu an chhungkhat laina leh thiante an belh bakah mahni In luaha awmte an ni.