Khawbung khua in Prof Lalnilawma an chawimawi

Champhai District-a Khawbung khua chuan an khawchhuak Mizoram sawrkar-a Minister Prof. Lalnilawma chawimawina hun nimin khan an buatsaih.

Khawbung Community Hall-a amah chawimawina leh lawmna hunah hian Prof. Lalnilawma chuan Khawbung khawtlangin amah lawmpuina leh chawimawina hun an hmang chu ropui a tih thu a sawi a, an chhungkaw chunga khawtlang thatna chu an theihnghilh tawh dawn lo tih a sawi a. Khawbung khawtlang hruaitu ten amah chawimawina hun buatsaih an tum thu an sawiin, mimal sum pek tur a neih loh avang leh sawrkar pawisa hman a duh loh avangin a hnar hmasak zet thu pawh a sawi a, khawtlangin anmahni insengso a hetiang hun an buatsaih sak chu a lawm takzet tih a sawi bawk.

Prof. Lalnilawma chuan Khawbung khawtlangin intodelhna leh hmasawnna kawngah hmabak tam tak an la nei tih a hriatpui thu pawh sawiin, hma an sawn zel theih nan theihtawp chhuahpui a tum thu leh tlanchhiat a tum loh thu a sawi a. Hmasawnna rotling din a nih theih nan kalkhawm mipuite thawhpuina ngenin, sawrkar hmalakna lo enpui thin turin a chah a. Mipuite chu a Department chan hnuaia hna lungawithlak loh a awm chuan a hnenah thlen turin a ngen a, hna thawk tha lo te a dim dawn lo tih a sawi bawk. Hmasawnna hnathawktute hnen atangin sawrkarin engmah lak heu sak a tum lo a, hna tha taka an thawh erawh a beisei let thung tih a sawi bawk.

Prof. Lalnilawma lawmna leh chawimawina hun hi Khawbung Branch YMA President leh Organising Committee Vice Chairman Lalchhanhima chuan kaihruaiin C. Rokhuma, VCP Khawbung chuan inlawmna thu a sawi a, Khawbung Welfare Committee Adviser R. Liankima leh Prof. Lalnilawma nu, Biakveli te pawhin thu an sawi a. He hunah hian Khawbung khawtlang chhunga pawl hrang hrang ten Prof. Lalnilawma hi lawmpuina thuziak leh parthi an hlan bawk a ni.

Prof. Lalnilawma hi kum 2023 MLA Inthlanpuiah khan Tawi bial atanga thlantlin a ni a, Mizoram sawrkar hnuaiah Minister of State niin Department pathum - Rural Development, Public Health Engineering leh Horticulture te a enkawl mek a. Nimin-a he hun hman ah hian Khawbung khawtlang mamawh - Tarpaulin, Silpauline, Sprayer, Grass Cutter leh hlo Tur te a hlan a. He hun pual hian Prof Lalnilawma farnu, Dr. Irene Lalrinpuii chuan niminpiah atang khan a thlawna inentirna an buatsaih bawk.

Khawbung Community Hall-a hun a hman zawh hian Minister Prof. Lalnilawma hian Hlakungpui Mual-ah Far thing a phun a. BDO Office-ah Khawbung RD Block hnuaia Self Help Group aiawh te nen an inkawm nghal bawk a ni.