ZMC atanga pass chhuak zinga Doctor 39 te NHM hnuaia thawk tura lak nghal an ni

Zoram Medical College (ZMC) din champhaphak vawi 6-na chu nimin khan lawm niin he hun hmanpuitu Health Minister Lalrinpuii chuan ZMC atanga pass chhuak zinga Doctor 39 te chu National Heath Mission hnuaia thawk tura lak nghal an nih thu a sawi.

ZMC dinchampha lawmna nimin-a neih ah hian Health Minister Lalrinpuii chuan ZMC-a hmasawnna hrang hrang thlen tura bultantu leh theihtawp chhuahtute fakawm a tih thu sawiin, Sawrkarin Health Sector, a bikin Primary Health Sector ngaipawimawhin thingtlang mipuite ban phak PHC hrang hranga Doctor indaihlohna phuhruk dan kawng a dap nasa tih a sawi a, ZMC atanga pass chhuak zinga Doctor 39 chu te National Heath Mission (NHM) hnuaia thawk tura lak nghal an nih thu sawiin, Medical College tha nei turin hmunhma leh bungraw tha, Zirtirtu fel leh rintlak bakah zirlai tha neih a pawimawh hmasak thu a sawi a, ZMC-ah Cardio-Thorasic wing din turin State Sawrkar-ah rawtna thlen a nih thu leh IVF Centre nei tura ruahmanna siam mek a nih thu a sawi bawk.

Health Minister chuan ZMC infrastructure tihchangtlunna tur Project Sawrkar laipuiah thlen a nih thu sawiin, PM Ayushman Bharat hnuaiah ICU, HDU, Isolation Ward, Dialysis Unit leh pawimawh dangte kengtel khum 50 awmna Critical Care Block dinna tur hmuh a nih thu leh chak taka hmalak mek a nih thu a sawi a. Medical Research lamah tanlak zual a tul thu leh Mizoram leh a chhunga chengte behchhan ngeia Research neih a tul thu sawiin, mipuite'n hriselna tha zawk an neih theih nana ngaihtuahna seng turin ZMC a thawk Doctor thiam tak takte a sawm a. He hunah hian Crawford Gents' Hostel leh Hospital Management Information System (HMIS) te pawh a hawng nghal bawk a ni.

ZMC hi August ni 7, 2018-ah hawn niin NMC in June ni 16, 2023 khan recognition a pe a. Khum 364 awm mekin tun dinhmunah zirlai 395, State chhung mi 288, State dang 48 leh NRI 59 an awm a. Faculty 112, Non-Faculty Doctor 40 leh Non-Teaching Staff 572 an awm mek a. Superspecialist leh Specialist hrang hrang Department 22 ah a awm a. Thisen Test chi hrang hrang, Ultrasound, CT Scan leh MRI te a tih theih a. Golden Card (AB-PMJAY), Health Care, ESIS, ECHS, RBSK, Dr. Ambedkar Scheme-ah te  Empanelled Hospital niin OPD Pharmacy-ah a thlawnin damdawi sem thin a ni.

Nimin-a Health Minister in a hawn tak Hospital Management Information System (HMIS) hi National Health Mission hnuaia ECRP-2 Project kentel a ni a. Nextgen eHospital portal kaltlangin Damdawi In hmalakna te khawl hmanga kalpui (computerised) tur a ni a, he Project hi Mizoram a District Hospital 11-ah kalpui tum a ni.

HMIS-ah hian QR Code hmangin OPD/Casualty inziahluh bakah appointment Book leh cancel a tih theih a. Hospital-a damlo inenkawlna kimchang taka Record, bill siam, damdawi chawh, investigation result leh damlo record-te awlsam taka enlet theih tura dah theihna a ni a, Laboratory leh Radiology test tih hun tur leh indawt dante, result endik leh report theihna turte siam a nih bakah pawimawh dangte a kengtel a ni. ZMC-a HMIS kalpui tur hian tun thlengin NHM sum cheng nuai 47 bawr vel sen tawh a ni.

Crawford Gents' Hostel, Residential Hostel pahnih awmna hi NESIDS sum cheng vbc. 10 senga sak a ni a, October 24, 2021-ah thawh tan niin nikum October 24 khan zawhfel a ni a. He hna a Contractor hi Ngur-zamlova, Kolasib niin Mizoram PWD in Architectural & Structural design an siam a. Zopa chhiara chhawng 6 niin, Floor area zau zawng belhkhawm hi square metre 2518.57 a ni a. Single Room 10, Double Room 37 leh Khum 84 a awm a ni.