Govt. Aizawl North College Girls Hostel hawng

Aizawl East-I Bialtu MLA leh EF&CC Minister Lalthansanga chuan nimin khan Zemabawk Lungbial Veng-ah Govt. Aizawl North College Girls Hostel a hawng.

Aizawl North College Girls Hostel thar hawnna ah hian bialtu MLA chuan Aizawl North College chu thingtlang lam attnga belh tam ber pawl College a nih thu te, College kalte tana Hostel tangkai zia leh amah ngei pawh Hostel a lo awm tawh thin a nih avanga Hostel pawimawhzia hrechiangtu zing a mi a nih thu te a sawi a. Rationalisation of Teachers chungchang pawh sawiin, Mizoram Work Ethics chu tihmasawn a, Minimum Management Maximum Works kalpui a pawimawh thu te a sawi bawk.

Govt. Aizawl North College Girls Hostel hi kum 2013-a UGC Grant hmanga sak leh din chhoh a ni a. Kum 2017 October-ah peihfel niin, thuamthat chhoh bek bek a nih hnuah kumin hian luah tan theih tur leh hman tangkai tura chhawpchhuah a lo ni ta a ni. He Hostel-ah hian a remchan ang zela mi 20 thleng pawh awm thei tura duan a ni a; awm man thla khatah Rs. 3500/- chawiin College kal lai naupang te chuan In luah tur leh Aizawl-a awmna tur remchang an nei lo anih pawhin zirna an chhunzawm theih phah dawn a ni.