India leh Myanmar ramri hung la dodal zui zel

Sawrkar laipui-in Mizoram leh Myanmar inkar ramri hung tura a tih chu Mizoram sawrkar chuan a la dodal zui zel.

Sawrkar laipui-in India leh Myanmar inkar ramri KM 1,643 a thui hung chungchangah Arunachal Pradesh leh Manipur sawrkarte Ministry of Home Affairs-in tunhnai a na taka a nawr laiin Mizoram sawrkar chu nawr ve bawk mah se a nawr na ve vak lo ni a hriat a ni a. Home Department hotute hnen atanga thudawn danin Ministry of Home Affairs hian hun hma lam deuhah khan Mizoram leh Myanmar ramri KM 404 a thui hung tur hian a rawn ti a. Sawrkar hmasa leh tun sawrkarin a dodalna-te chu Ministry of Home Affairs-ah thawn thlak ve ve a ni. MNF sawrkar lai khan Council of Minister thukhawm chuan ramri hung an dodal chungchangah thutlukna an lo siam tawh a. ZPM sawrkar pawhin dodal chhunzawm zelin Assembly-ah ramri hung an duh loh thu hi pulutin Assembly chuan lungrual takin a lo pawm a ni. 

Hemi chungchangah hian Home Minister K. Sapdanga chuan kumin February ni 28 khan Myanmar nena zalen taka inkalpawh tawn theihna tihtawp leh ramri hung tura thutlukna dodalna Official Resolution chu Assembly inkhawmah a pulut a. He Resolution hi lungrual taka pawm a ni. He Official Resolution-ah hian zalen taka inkalpawhna titawp lova ramri hung bawk loh bakah ramri tawn tawna awm Mizote inzawmkhawmna atana thawk zawk turin sawrkar laipui chu an ngen nghal a ni.

Union Home Minister Amit Shah chuan kumin February ni 6 khan sawrkar laipui-in Myanmar leh India hmarchhak State 4 - Arunachal Pradesh, Nagaland, Manipur leh Mizoram ramri chu hung a nih dawn thu leh zalen taka intlawhpawh theihna dan pawh hlih a nih thu a puang a. Hei hi Mizoram leh Nagaland sawrkar bakah pawl hrang hrangin an dodal nghal a. Mizoram-ah chuan tlawmngai pawl inzawmkhawm NGO Coordination Committee chuan Larsap kaltlangin Union Home Minister hnenah hian sawrkar laipui thutlukna an dodal thu an thawn nghal a ni.

Economics lam mithiamte chuan ramri a zalen taka intlawhpawh theihna hlih leh ramri hung hian Mizoram leh Myanmar ramri a cheng mi tam tak ei leh bar bakah sum leh pai dinhmun a chhe zawngin a khawih nasa hle dawn niin an sawi a. A bik takin Champhai District a ramri a insum-dawnna hmun Zokhawthar leh Myanmar lama chengte bakah ramri a insumdawn tawnna dang 'Border Haat' chhawr tangkaituten eizawnna kawngah harsatna an nei nghal dawn a. Mizorama chengte Bawngsa ei za zela 90 chuang hi khilam atanga lakluh a nih avangin Mizoram pumin harsatna a tawk nghal bawk dawn a ni, an ti. Ramri hung a nih chuan Mizoram lam ramri a chengte'n Tiau lui kama an nul-te enkawl thei lovin Tiau lui Sangha hmanga eizawngte pawhin harsatna an tawk nghal dawn niin an sawi bawk.