Huaisen taka ram siamthat hna kalpui a ngai tih Minister K. Sapdanga’n a sawi

DP&R changtu Minister K. Sapdanga chuan huaisen taka ram siamthat hna kalpui a ngai tih sawiin, Aikal tihtawp avang hian mipuiin harsatna engemawchen chu kan tawk ngei dawn tih sawrkar hotuten an hmu tlang vek tih a sawi.

ZPM Party in nimin-a Aizawl-a an party Office a Chhung Inkhawm an neih ah Minister K. Sapdanga chuan tunhnaia an lungkham ber chu aikal tihbo a ni tih sawiin, thenkhat chuan an huphurhpuiin an tih theih an ring lo hial tih a sawi a. “Sawrkar hmalaknain Department tinah aikal an neih leh neih loh zawh a ni a, aikal titawp tura thuchhuah siam a ni bawk a, titawp lo Department an awm chuan Department hotuten mawh an phur dawn a ni,” a ti a. “Aikal tihtawp avang hian mipuiin harsatna engemawchen chu kan tawk ngei dawn tih hi sawrkar hotuten an hmu tlang vek a, amaherawh chu huaisen taka ram siamthat hna kalpui a ngai a, mipui pawh kan chhel a ngai hle, hun a kal anga thil a la rawn inher dik mai dawn a ni,” a ti bawk.

Thu belhchian dawl lo hmanga eptuten mipui rilru hruaipen tuma an tithlabar fo chu a pawi takzet tih Minister K. Sapdanga chuan sawiin, “Eptu party-ten Ration Card chungchanga mipui thu an fah dan hi a dik tawk lova, chhungkaw khawsak ziaawm zawk Ration Card Var hmangtuten sawrkar atanga buhfai Subsidy-a an leina man tihsanna ah hian chhungkaw harsa zawk Ration Card Eng (yellow) leh Ration Card Pawl (Blue) hmangtute a huam lo tih kan hriat a tha,” a ti a. “Tunah hian Supply Minister hmalaknain Ration Card siam that hna kalpui mek a ni a, chhungkaw khawsak harsa zawkte tan phurrit tur a awm lo,”a ti.

Tunhnai khan Assam lamin an Duty Camp bul leimin an thianfai tih pawh Home Minister K. Sapdanga chuan sawii, “Hei hi eptu party lamin mipui tihthlabar nan hmangin thu an vawrhdarh leh vak mai a, hetianga thu belhchian dawl lo hmanga mipui rilru an kuai peng thin hi a pawi ka ti hle,” a ti a. “Tunhnai khan Assam Sawrkar nen pawh ramri chungchangah tha takin meeting kan nei a, hmasawnna kan hmu chho mek a ni. Tin, Airport chungchangah pawh Mizoram tana tha tur zirchianna neih anih chauh laiin, eptu party lam chuan thutlukna siamfel ta ang maiin thuthang dik lo an lo vawrh darh leh chiam mai hi a pawi ka ti hle a ni,” a ti bawk.

K.Sapdanga chuan Sawrkar tha nei tur chuan Opposition Party tha tak neih a ngai tih pawh he hunah hian sawiin, “Zoram mipuiten Eptu Party tha tak min pe hi lawmawm hlein ka hria a, sawrkar leh mipui tan malsawmna ropui tak an ni thei a ni. Chutih laiin Opposition Party-te pawhin sawrkar tihbuai tum nan thubelhchian dawl lo an hmang fo a, hei erawh mipui nuihzat leh rin loh hlawh theihna a ni,” a ti bawk.