EMRS-a thawk tur lak thar ten ni 5 awh training an tan

Social Welfare & Tribal Affairs, Women & Child Development Minister Lalrinpuii chuan Eklavya Model Residential School chuan zirna tha leh changtlung zawk bakah khawtlangah intluk-tlanna thlen a tum tih a sawi.

Ni 5 chhung awh tur Eklavya Model Residential School (EMRS) hnuaia thawktu lak tharte pual Orientation Training hawnna nimin-a SIRD Training Hall, Durtlang-a neih a hmanpuina ah ah Minister Lalrinpuii chuan Eklavya Model Residential School chuan zirna tha leh changtlung zawk bakah khawtlangah intluktlanna thlen a tum thu sawiin, he huna tel te chu hemi ti hlawhtling tura mi pawimawh takte an nih avangin inpumkhatna, mitin huapzo leh hma-sawnna thil thar thlen tura theihtawp chhuah turin a fuih a; “Kan tum ber tur chu zirna chauh ni lo, khawtlang tana chhawrnahawm mi tha chherchhuah a ni,” a ti a. Mizoram chu tawng, hnam ziarang leh tih dan phung hrang hrang awmna a nih avangin hengte hi pawm thiama inzirna leh hmasawn nana hmang thiam turin a chah a, hei hian zirna hmunhma duhawm leh zahawm a siam thin a ni a, ti bawk.

Mizoram EMRS Governing Body Chairman ni bawk Lalrinpuii chuan EMRS thawktute chu zirna mai bakah nunkawnga midang fuih phur theitu hmanraw tangkai tak an nih theih thu sawiin, zirlaite tana entawntlak leh kaihruaitu nih tum turin a chah a. EMRS hmalaknaa tel tura lak thar zawng zawngte chu thinlung taka lawmthu hrilhin, zirna, khawtlang rawngbawlna leh tribal-te tihhmasawnna tura an inpekna chu a ngaihhlut-awm mai bakah tihmakmawh tak a ni, a ti bawk.

He hun hi Social Welfare & Tribal Affairs Director Dr. Lalhriatzuali Ralte IAS, CEO, Mizoram EMRS Society chuan kaihruaiin EMRS School 11 hnuaia thawktu lak thar mi 42 te an tel a ni.