Hmun hrang hrangah Tiranga Yatra neih a ni

India ram Zalenna champha lawmna puala ‘Har Ghar Tiranga’ hnuaiah Hnam puanzar nena kawng zawhna hun, ‘Tiranga Yatra’ chu nimin khan Mizoram hmun thenkhat ah neih a ni.

Aizawl-ah chuan ‘Tiranga Yatra’ hi Art & Culture Department bultumin Chanmari leh Sikulpuikawn inkarah neih a ni a, he hunah hian zirlai naupang 800 chuangin India Flag keng chungin kawng an zawh a, Vanapa Hall kawt-ah intawkkhawmin Er. Lalhriatpuia, Deputy Commissioner hovin ‘Har Ghar Tiranga Pledge’ an chhamrual bawk a ni. ‘Har Ghar Tiranga’ pual a program hi August ni 15 thleng kalpui tur a ni a, Vawiin hian Vanapa Hall-ah ‘Tiranga Concert’ neih leh a ni ang.

Lunglei-ah pawh 'Tiranga Yatra' hi Independence Day lawmnaa Parade Contingent tur ten Parade practice an neihna hmun atanga neiin Khawzawl-ah pawh Zirlai naupang ten Parade an zirna Mualvawm Field atanga Taidawnkawn thleng an nei bawk a. Siaha-ah pawh Har Ghar Tiranga Campaign hnuaiah Tiranga Yatra (Flag procession) hi DC Office tual zawl atanga Siaha Bazar thleng neih a ni a, zirlai naupangte leh mipui thahnem tak ten zalenna sual chhuah nana nunna chan ta te hriat reng nan Hnam puanzar (National Flag) nen kawng hi an zawh a ni.