National Space Day pualin Workshop buatsaih a ni

Zonuna Kawlni (LENKAWL) • August 17, 2024 • Comments • Mizoram

India Thlalem Chandrayaan-3 hlawhtlinna denchhenin Thla leilung a rah ni, August 23 chu Prime Minister Narendra Modi chuan ‘National Space Day’ atan a puang.

National Space Day lawmna chi khat atan hian nimin khan Aizawl-a Irrigation and Water Resources Department Auditorium-ah 'Workshop on Emerging Space Technology, Appplication in Water Resource Management' chu neiin he hun hi IWRD Minister PC. Vanlalruata chuan a hmanpui a, rampuma National Space Day puala hetiang Workshop buat-saihna tur State 11 zinga Mizoram thlan a ni chu ropui a tih thu a sawi a. Workshop-in a tum ang tak a Space lama thiamna chu tangkai taka hman zel theih a nih ngei a besei thu a sawi a. Space lama thiamna in kan ram leilung a tui awmte hman tangkai kawnga min puih dan turte a tarlan bakah, heti lama Department (IWRD) hmalakna kal mek thenkhat, Real Time Data Acquisition System (RTDAS) chungchang te, State Water Informatics Centre din tura theihtawp an chhuah mek thute a tarlang nghal bawk a ni.

Ministry of Jal Shakti chuan Mizoram telin, State thlan bik 11-ah National Space Day hmang tur hian ruahmanna a siam a, a lawmna pui ber erawh August 23, 2024-ah New Delhi-a hman tur a ni. Ministry lam hian National Space Day lawm nan Water Resources lama Space Technology kan hman tangkai dan Workshop buatsaih tura a tih angin Mizoram-ah chuan Irrigation & Water Resources Department, Pachhunga University College leh Indian Institute of Technology Roorkee te nena tangkawpin he hun hi buatsaih a ni.

Nimin-a he Workshop-ah hian V. Laleng-mawia Addl. Secretary, (IWRD)-in inlawmna thu leh Workshop kaldan tur sawiin, Er. Lalrotluanga, Chief Engeneer, IWRD-chuan Workshop-in a  tum tlangpuite a tarlang bawk a ni.