Hand Holding Scheme hi tlangzarh kan chak tawh, CM Special Package siam a ni dawn - Chief Minister

Nimin khan Chief Minister Lalduhoma hovin Mizoram State Policy Coordination Committee leh Implementing Department hotuten Hand Holding Policy kalpui dan tur (guidelines) an thlirho a, Chief Minister chuan Hand Holding Scheme hi tlangzarh an chak tawh tih sawiin, kumin ah Pilot Project angin an kalpui dawn tih a sawi bawk.

CM Conference Hall-a thutkhawm neih ah hian Chief Minister Lalduhoma chuan Hand Holding Scheme hi tlangzarh an chak tawh tih sawiin, “Tih tur tul la awm apiangte chinfel vat vat kan duh tawh hle,” a ti a. “Kan sawi fo tawh thin angin he Scheme hi Bank te nena tangkawpa kalpui tur, Central Scheme awmsa thenkhatte nena Convergence a kalpui tur a ni a. Progress Partner te tana rulh leh ngai hmalakna deuh zel a ni. Amaherawh chu dahkham ngai lo, a tithate tana interest awm lo a ni thung,” a ti a. Tunhma chuan PMEGP te chu Margin Money duh vang maiin miten an dil thin thu leh hmalak tumna tak tak a awm thin lo tih sawiin, “Hand Holding Scheme hnuaiah hi chuan khatiang chi kha a awm kan remti tawh lova, a thlawna sem kan tum lova, a dawngtu tur (progress partner) te hi duhsak bik nei lovin a hlawhtling ngei tur te chauh thlan tur a ni,” a ti.

Chief Minister chuan Partner thlan leh enkawl zui chu Implementing Department te mawhphurhna pawimawh a nih thu leh Loan deuh veka kalpui tur a ni chungin eizawnna tha taka lo kalpui mek tawh sa, tlem azawnga han puiha hmasawn dawrh thei te puihna tur bik ‘CM Special Package’ siam a ni dawn tih a sawi a, tanpuina sum erawh a tam thei lovang tih a sawi a. He Special Package dawngtu tur hi Implementing Department te bawkin an thlan dawn thu leh an vil zui bawk tur thu a sawi a, “Kumin bik hi Pilot Project angin kan kal phawt ang a, a tul ang zelin kan ti lian chho dawn a ni,” tiin Hand Holding Policy bultan dan tur pawh a tarlang nghal bawk.

He thutkhawm ah hian Mizoram State Policy Coordination Committee-a Member Secretary leh Planning Secretary Lalmalsawma Pachuau chuan Hand Holding kalpui dan tur (guidelines) duan tawh te a sawifiah bakah ZIDCO Managing Director LP. Lalchangkima chuan Interest Free Loan kalpui dan tur leh Guarantor-a sawrkar a tan dan tur ruahmanna te a sawifiah ve bawk a. Hemi hnu hian zawhfiah duh leh hriatchian duh an neih te zawtin hun hman a ni bawk.

He thutkhawm ah hian Minister thenkhat te leh Adviser to CM bakah Coordination Committee Member bakah Official pawimawh te an tel a ni.