Kohhran te thurawn leh zilhna te ngaithla turin sawrkar chu a inhawng - Chief Minister

Chief Minister Lalduhoma chuan nimin khan a Pisa-ah Synod Social Front hruaitute kawmin Kohhran te thurawn leh zilhna te ngaithla turin sawrkar chu a inhawng tih a sawi.

Synod Social Front hruaitute hnenah hian Chief Minister chuan eirukna tibo tur leh eiruk chingte chunga dan anga hmalak anih theih nana Lok Ayukta an thuam chak chhoh mek dan te, India Dan tharin a phut ang thlapa CBI hnena General Consent an pek thu te, Restricted Tender chu Dan ang thlapa kalpui an tum thu te a lo hrilh a. “Revised Estimate siam hi Project Date of Completion pawhsei nen a kalkawp duh hle a. Kan hunah hian heng thil pahnih hi tihbo kan tum. A umzuitu tur mipui huapzo Project Monitoring Committee kan din a. Team pali-ah insem darhin endik hna an kalpui mek a. Anni'n engkim chipchiar leh uluk taka an endik hnua an remtihsak hnenah chauh Project Cost Revised leh Date of Completion pawhsei hi kan phalsak dawn a ni,” a ti.

Contract hralh chhawn pawh tihbo an tum tih Chief Minister chuan sawiin, “Tunah chuan han hralh sawi tur pawh a awm rih lovin kan hria. Chutihlaiin contract hi a hmu ngaiin an hmu tluk tluk thei bawk. Heng thil fel tawk lo awm thei te tibo tur hian hma pawh kan la mek,” a ti a. Chief Minister hian sawrkar chu Kohhran te thurawn leh zilhna te ngaithla turin a inhawng em em tih sawiin, “Rawn inthlahrung reng reng suh u,” tiin Synod Social Front hruaitute hi a chah a ni.

He inkawmna ah hian Synod Social Front hruaitute hian Kohhran chuan sawrkar chu tha taka thawhpui an duh tih sawiin, “Mipui sawrkar tih ri ringawt pawh hi a mawi a ni. Chutihlaiin sawrkar kalphungah sawisel tur a awm chuan kan sawi hreh dawn chuang lo,” an ti a. “Vawiin ah hian Synod in Corruption do a lo rel te bawhzuiin sawrkara thlen tur chi kan neih te kan rawn thlen,” tiin Lok Ayukta tihchak te, Restricted Tender chu loh theih loh chauh kalpui te, Project Cost ennawn (revised) tihbo te, Contract hralhchhawnleh tihbo te tha an tih thu an thlen a. “Heng thil te hi sawrkarin kalpui a tumsa leh a kalpui mek te an ni tih kan hria a, kan lawm hle a ni,” an ti a. Eirukna do tura Kohhran huang chhunga hmalak an tum dan te pawh Chief Minister hi an hrilh bawk.