'Ek Ped Maa Ke Naam (A tree as tribute to my Mother) and Plant4Mother' pualin thing phun a ni

Rampum-a 'Ek Ped Maa Ke Naam (A tree as tribute to my Mother) and Plant4Mother' hman mek pualin nimin khan Thenzawl-a Common Poshan Vatika-ah thingphun runpui neih a ni.
Nimin-a he hun hman hi Women & Child Development Director Zoramthangi Chhangte chuan hmanpuiin 'Ek Ped Maa Ke Naam (A tree as tribute to my Mother) and Plant4Mother' hmalakna kal zelah Thenzawl-ah hun an hmang thei chu lawmawm a tih thu sawiin, “Kan ram leh khawvel pawhin a mamawh thing te hi boruak tha min petu an ni a, tunlai khawvela kan buaina lian ber boruak lum chho zel venna atana pawimawh ber a ni,” a ti a. Thing leh mau te hian leilung luangral tur a veng a, khuarel chhiatna thleng thei tam tak lakah vengtu tangkai a nih thu leh mihringte kan dam khawchhuah theihna tura thil pawimawh a nih avangin mipui thinlungah thingphun pawimawhna leh thingphun uar kan mamawh tawhzia tuhngheh a tul thu a sawi a. “Vawiina kan thing phunte hi kan tuchhuan lo la awm zel turte hnena kan thilpek theih hlu ber a ni tih hriain, tuna kan thing neih sa te humhalh chungin thingphun i uar sauh sauh ang u,” a ti a ni.

He programme hi Women & Child Development Deputy Director Sailopari chuan a kaihruai a. Ek Ped Maa Ke Naam an kalpui zelna ah Anganwadi Centre tinah thei tiak phun uar tura hmalak mek a nih thu sawiin, nasa zawka thing leh thei phun uar kawnga hma kan sawn theih nan he hun hi hman a nih thu a sawi a. Thenzawl Forest Division-a Divisional Fore4st Officer (DFO) Lalnungrenga pawhin he hun hi hmanpuiin thing leh thlai phun tam a tul thu leh kan ramin kan neihsa te ti chereu lova kan humhalh tlat a pawimawh thu a sawi a, tun atanga hma kan lak loh chuan nakin zelah kan tan a pawi dawn tih a sawi bawk.

'Ek Ped Maa Ke Naam (A tree as tribute to my Mother) and Plant4Mother' hnuaia thingphun runpui hi July ni 22, 2024 khan Women and Child Development Minister Lalrinpuii chuan Sakawrhmuituaitlang, Sihphir-ah a lo hawng tawh a. He hunah hian Environment Forest & Climate Change Department te nen thawkhoin thingtiak 50 chuang an phun a ni a. Nimin-a he hun hman ah hian Serchhip District Programme Office leh Serchhip ICDS Project, Thenzawl Forest Division Thenzawl hnuaia thawktute bakah Thenzawl khuaa Anganwadi Workers leh Anganwadi Helper te pawh an tel a, thing tiak 60 chuang an phun a ni.