Volleyball inelna ah New Serchhip VC an Champion

Serchhip District Volleyball Association buatsaiha Season Opening Tournament chu nimin khan Final khela zawhfel a ni a, Mipa leh Hmeichhia inelna ah New Serchhip Volleyball Club an Champion ve ve a ni.

Serchhip Vengchung Volleyball Court-a khelh SDVA Season Opening Tournament hi nimin khan Final khelh a ni a, Hmei-chhe Team inelna ah New Serchhip VC leh Darnam VC te inhmachhawnin New Serchhip VC hian 3-2 in hnehna an chang a, Champion Team New Serchhip VC hian Rs. 8000/- dawngin pahnihna Darnam VC hian Rs. 4000/- an dawng bawk.

Mipa Final-ah New Serchhip VC (A) leh Darnam VC (A) te bawk inhmachhawn lehin New Serchhip VC (A) te hian 3-1 a hnehna changin an Champion  bawk a, New Serchhip VC (A) hian lawmman ah Rs. 10,000/- dawngin pahnihna Darnam VC (A) hian Rs. 5000/- an dawng bawk ve a ni.

Nimin-a SDVA Season Opening Tournament kharna Inkhawm hi SDVA Patron leh PWD Serchhip Division-a EE, PC. Zokhuma chuan khual-lian nia hmanpuiin Mizo ten infiamna lamah nasa taka hma kan sawn thu leh National mai ni lo, International Level thlenga hming lang tham kan awm ta chu lawmawm a tih thu a sawi a. Tuna Volleyball inelna a tel te pawh hian theihtawp an chhuah a nih chuan sang tak an thleng thei tih sawiin, chumi tur chuan taihmakna, theihtawp chhuahna, tih tak takna leh insumtheihna te neih a tul thu a sawi a. Infiammi rilru pu-a chak dan leh chak loh dan thiam tura fuihin, SDVA ten tun Season bul an tan chhoh mekah hlawhtlinna sang zawk chang zel turin duhsakna a hlan bawk a ni.

Nimin-a he Tournament kharna inkhawm hi SDVA President K. Tlangthanmawia chuan kaihruaiin Secretary leh Match Commissioner Zothansanga chuan Technical Report a pe a, he Tournament-ah hian Mipa Team 15 leh Hmei-chhia Team 7 an tel a ni.