Ruihhlo do chungchang ah State pahnih te inkawm

Excise & Narcotics Department changtu Minister Lalnghinglova Hmar chuan nimin khan Guwahati-ah Assam sawrkar-a Excise Department hnuaia mi pawimawhte kawmin ruihhlo do chungchang a sawipui a, indawr zui zel bakah hmalak zel dan turte an rel a ni.

He inkawmna ah hian END Minister hi nimin khan Assam Excise Minister Keshab Mahanta nen inkawm turin ruahmanna siam a ni a. Assam Minister hi tul bik thil vanga a remchan loh thut avangin Phone hmanga inbiain hmalak dan turte an sawi dun a. Lalnghinglova Hmar in State pahnih harsatna tawh mek chungchangah uluk zawka inbiakna neih tha a tih thu a hrilh chu Assam Minister pawhin tha a ti a; Excise Department chauh ni lo Home Department aiawhte nen pawh sawihoa tanlak a tul thute an sawi dun a ni.

Assam Excise Minister ruahman angin Assam sawrkara Excise Department Secretary Indreswar Kalita IAS leh Commissioner of Excise Jitu Doley IRS te nen ruihhlo do kawnga State pahnihte thawhho dan sawihoin an inkawm bawk a. END Minister chuan Myanmar atanga Heroin No. 4 lokal chu Assam huamchhungah siam danglamin 'Bagha Cap' ti a vuahin Mizoram-ah a lo luh leh thin thute, damdawi hmansual chi an tawlhluh thin dante leh Assam chhunga khaw thenkhatah ruihhlo zuarte an zalen hle ni a Mizoram atanga hriat a nih thute Assam Excise Department hotute hi a hrilh a. Assam Excise Department hotute chuan Mizoram Excise Minister thusawite chu chhinchhiahin an bawhzui tur thu an sawi a. Hun remchang hmasa berah an Minister hova sawi hova an zirchian tur thu leh Mizoram Minister rawtna anga state pahnihte ruihho do kawnga inkawm leh thuai tha an tih thute an sawi a ni.