ASF vanga Vawk thi sang hnih aiin a tam ta

Serchhip District-a Vawk hri, African Swine Fever (ASF) leng chu ala ziaawm hlei thei lo a, nimin khan Vawk thi 64 zet chhinchhiah belh leh a ni a, ASF vanga Vawk thi hi sang hnih aiin an tam ta a ni.

Serchhip-a AH&Vety Department ten an chhinchhiahna atanga a lan danin nimin a ASF vanga Vawk thi 64 zinga 26 te hi New Serchhip South VC huamchhunga mi te niin Serchhip Field Veng-ah 10 a thi leh bawk a, New Serchhip North-ah Vawk 6 thiin North Vanlaiphai khua ah 5, Lungchhuan-ah 4, Chhiahtlang leh Serchhip Hmar Veng-ah 3 ve ve leh Chekawn leh Khawlailung-ah pahnih ve ve thiin Serchhip Dinthar, Serchhip Vengchung leh East Lungdar-ah pakhat ve ve a thi bawk a ni.

Nimin vek khan Veng leh khua 17-ah hri leng darh zel tur venna atan Vawk 131 zet suat a ni leh bawk a, Vawk suat tam zualna New Serchhip South-ah Vawk 39 suatin Lungchhuan leh East Lungdar-ah 20 ve ve suat an nih bakah Khawlailung-ah 10 suat a ni bawk.

Heti hian nimin thleng khan Serchhip District-a Veng leh khua 30-ah kumin hian ASF vangin Vawk 2044 a thi tawh a, Vawk 5233 suat ni tawh bawkin ASF hri leng hi chhungkaw 1463 in an tuar tawh a ni. Serchhip District-ah hian ASF vanga Vawk thi tamna ber khua chu Thenzawl niin Vawk 571 a thi tawh a, North Vanlaiphai-ah 316 a thi tawh bawk a ni.