Serchhip khawpui bawlhhlawh paihna hmun siam dan turah inrawnkhawmna neih a ni

Serchhip khawpui tana bawlhhlawh sawngbawlna hmun, Solid Waste Management Centre siamna hmun tur chungchanga inrawnkhawmna chu nimin khan Serchhip DC Meeting Hall-ah neih a ni.

Serchhip khawpui tana Solid Waste Management Centre dinna tur hian Serchhip-a UD&PA Office chuan kum 2020 vel atang khan ruahmanna engemawchen a lo kalpui tawh a. Serchhip khaw dai, Kikawn atanga chhuahlam-a Lungrual ramah he Centre hi sak tuma hmalak niin a ram te lei fel a nih hnuah Building thenkhat pawh sak ni mah se Serchhip khaw mipui tuitlan ber Tuikum tui lakna atanga hla lo leh bawlhhlawh te pawh Tuikum lui-a lut mai thei nia ngaihna a awm avangin hmun remchang dang zawn zawk nise tih rawtna a lo chhuak a. Hei vang hian Chhiahtlang khaw dai hmun remchang dap chhunzawm a ni a, Chhiahtlang atanga Lamchhip panna kawng Tualthah Mual an tih hmun ah ram hi ruahman leh niin hmalakna pawh thui tak kalpui a ni tawh bawk a. Amaherawh chu bawlhhlawh phurtute tan a panna kawng a thui deuh avangin Department chuan ngaihtuah nawn leh ni se tiin Serchhip DC-ah hian an thlen a, hei vang hian he inrawnkhawmna hi neih a ni leh ta a ni.

Nimin-a thutkhawm ah hian Serchhip-a District Adminstration lama hotute bakah UD&PA leh PHE Department hotute telin Serchhip Thalai Pawl (STP) aiawh te an tel a, Aizawl atangin UD&PA Department-a Asst. Engineer J. Laldingliana leh Sanitation Expert (SBM) Esther Vanlalmawii te telin Solid Waste Management Centre din dan tur leh hemi atana tul leh pawimawh hrang hrangte an sawifiah a. Hemi hnu hian sawihona neiin Tuikum tui lakna ti bawlhhlawh lo zawngin Serchhip Lungrual Ram leh Chhiahtlang dai-a Tualthah Mual chu a kawpa hman dan dap tha an ti a. Tuna Solid Waste Management Centre tur Lungrual Mual-ah hian hian bawlhhlawh tawih thei lo (Dry waste) sawngbawl a ni dawn a. Hemi sawngbawl a nih hnua hmantlak loh hi landfill-ah dah tur a ni dawn a. Landfill erawh hi chu Chhiahtlang daia Tualthah Mual-ah siam ni zawk se tiin hemi ang hian hmalak chhoh nise an ti a ni.

He thutkhawm kaihruaitu Serchhip District Bawrhsap Paul L. khuma chuan Serchhip District in chak zawka hma a sawn theihna turin khawtlang mipui te an pawimawh thu a sawi a. Sawrkar chu mipui rawngbawl tura din a nih avangin mipuite thlawpna leh tawiawmna tel lovin hmasawnna hna a thawh theih loh thu a sawi a. Chuvangin, District tana hmasawnna ruhrel din tura ruahmanna awm mek te leh an hmachhawpte tluang taka a kal zel theih nan mipuite chu Department te tawiawm tlat turin a sawm bawk a ni.