Akashvani Aizawl kum 58 tlin lawmna neiin Multipurpose Hall thar hawn a ni bawk

All India Radio (AIR) Aizawl tia hriat, Akashvani Aizawl chuan nimin khan kum 58 tling ta a, Aizawl Tuikhuahtlang-a Akashvani Aizawl Pisa-ah a lawmna hun buatsaihin Multipurpose Hall thar hawn a ni bawk.

Akashvani Aizawl Director leh Mizoram Cluster Head DR. Lalropuia chuan Multipurpose Hall thar hi hawngin Akashvani Aizawl in kum 58 a tlin theih nan hun harsa tam tak paltlangin mipuiten thu thar leh rimawi an hriat theih nan theihtawp chhuah thin a ni tih a sawi a. Hun hmasa lamah chanchinthar leh rimawi ngaihthlakna mumal a awmloh avangin Radio chu a tangkai thin hle tih sawiin, Akashvani Aizawl atanga rimawi leh hun buatsaih hrang hrang tihchhuah thin chuan hlut a hlawh thu leh mipuite beng ti tlaitu ber pakhat a ni tih a sawi a ni.

Akashvani Aizawl Director DR. Lalropuia chuan tunlai thiamna hmanga Phone leh Computer atanga thil thar hmuh zung zung theihna khawvel ah Akashvani Aizawl chuan mipuite tan a hnathawh chhunzawm zelin Social Media hrang hrangah mipuite hriat tur pawimawh hrang hrang chhawpchhuah thin a nih thu he hunah hian a sawi a, thuthar chhawpchhuah kawngah mipuite rin ber anih bakah rimawi lamah pawh All India Radio Artiste te chuan ngaihhlut an hlawh thin hle tih sawiin, Akashvani Aizawl bul tan hunlai chu rambuai intan chhoh lai niin rambuai vanga sawrkar laipuiin a din a nih thu a sawi a, hun hmasa lam atanga Mizo mipuite ngaihthlak duh hrang hrang leh pawimawh tak tak a puanchhuah thin chuan ngaihhlut a hlawhin hmun tinah Radio ngainatu an awm belh zel thu a sawi bawk a. Akashvani Aizawl chu hmarchhak State-a Station dang zingah hmasawn ber pawl a nih thu pawh sawiin, hmanraw tunlai ber ber hmanga hnathawh thin a nih thu leh heng te hian Mizoram chhunga hmun hrang hrang a thlunzawm thu a sawi bawk a ni.

Nimin-a Akashvani Aizawl in kum 58 a tlin lawmna hunah hian Akashvani Aizawl pawimawhna leh hlawhtlinna hrang hrang ngaihthlak a ni a, zai leh thusawi pawimawh tak tak ngaihthlak a ni bawk. Tun dinhmunah Akashvani Aizawl ah hian thawktu mi 170 an awm mek a, a ngheta thawk mi 50 leh a nghetlo mi 120 an thawk mek a ni.