Adviser to CM in Ration Card chungchang a hrilhfiah

Adviser to Chief Minister (Political) Lalmuan-puia Punte chuan niminpiah khan Phuldungsei, Zampui tlawhin tunhnaia Phuldungsei khuaa mi thenkhat Ration Card atanga paih an nih chungchang chu khawtlang hruaitute nen an inkawmna ah a sawifiah.

Phuldungsei VCP In-a inkawmna ah hian Adviser to Chief Minister (Political) chuan India ram pumah ‘One Nation One Ration Card’ kalpui mek a nih thu sawiin, “Mizoram leh Tripura-a awm kawp in lo awm avangin khawl (system) atangin harsatna a lo awm a. Mizoram lamah awm vek turin kan duh che u a, Mizoram mi in nih avangin Tripura lama Ration Card nei tawh lova Mizoram lama nei vek turin kan duh che u a ni,” a ti a. India ram hmundangah pawh thliarfel hna hi thawh mek zel a nih thu sawiin, “Phuldungsei chauh ni lo, Mizoram hmundanga mite pawh hmun khat aia tama awm kawpte pawh thliar fel a ni. Chuti chungin Tripura leh Mizorama neih kawp talh in duh a nih pawhin kawng danga in neih theih dan tur, Manual Ration Card ngaihtuah pawh Mizoram sawrkar chuan a inhuam a ni,” a ti a. “Mizoram sawrkar hi in nu leh pate kan ni a, nu leh pa in fate an kalsan ngai lo, eng kawngah mah kan kalsan ngai lovang che u,” a ti bawk.

National Food Security Act-in Ration Card hi Identity prove-na atana hman tur a ni lo a tih thu pawh Adviser to Chief Minister chuan sawiin, “State danga hnathawka kal thin (migrant workers) te pawh an inhlawhna State-ah pek theih an ni a, an khaw lamah erawh chuan paih hrih a ni ang a, an duh hunah dahlet leh tur a ni ang. Chutiang chu a kalphung a ni,” a ti bawk.

Adviser to Chief Minister hian IR Post Zomuantlang pawh tlawhin an harsatna tawh te a ngaihthlak sak a. Thuneitu sang zawk te hnena thlen a tum thu a sawi bawk a ni. He hunah hian IR Police te hian ramri venhimna kawnga hma an lakna te an lo hrilh bawk a ni.