ZPM General Hqrs. hruaitute leh Val Upa Council bakah Legislature Party ten thutkhawm an nei
ZPM Val Upa Council, ZPM Legislature Party leh ZPM General Headquarters Elected OB te chu nimin khan Chief Ministers Conference Room-ah thukhawmin Party kal zel dan tur leh Sawrkar inrelbawl dan kawnga hmasawn zel dan tur an sawiho.
He thutkhawm ah hian ZPM Val Upa Council (VUC) Chairman Lalfakzuala chuan Sawrkarin ram a kaihhruai dante ngun takin an lo thlir thin tih sawiin, “Sawrkar hmasaten ram an kaihhruai danah duh khawp loh lai kan neihte leh kan lo sawisel thinte chingfel tura tun sawrkara kan beiseinate sawihona hun kan nei leh thei hi a lawmawm hle a ni,” a ti a. ZPM Ministry chu Party sawrkar ni lova Mipui Sawrkar dik tak din tura beisei an ni tih sawiin, chumi lam hawia kal zel tur chuan VUC te chuan an beisei reng tih a sawi a. “Sawrkar inrelbawlnaah direct takin in rawlh thei lo mah ila thurawn pe tur erawh chuan thuk takin kan in rawlh zel dawn a, party leh sawrkarin tih dik loh an neih pawha khalh ngil tur leh thurawn pe zel turin theihtawp chhuahin in kaiza kan rawn veng zel dawn a ni,” a ti a. “Sawrkar hmasa tih angte tih ve zel a rem dawn lova, an tih ngam loh thiltha erawh huaisen taka kan tih a tul fo ang, dawih tak leh hlauh nei lutuka ram hruaite hi hmasawn lohna pakhat a ni a, midangte ngaichang lova thu duh lutuk pawh thil tha a ni chuang lo. Kawng engkimah Pathian kan dah hmaksak zel hi a finthlak,” a ti bawk.He hunah hian ZPM Legislature Party Leader Lalduhoma pawhin an taimak leh induhsak tawn rah sengin mipuite khawngaihna zarah sawrkarna an siam tih sawiin, “Val Upa Council ten fim takin ro an rel a, min uap tlata, kan tlanchak lutuk tur min veng a, kan kal muang lutuk tur min nawr a, kan bana min kaih tlat avangin ZPM party tan chuan an hlu hle a ni,” a ti a. “Kan rorel dan leh thu kan tih tluknaah te za ah za in kan ti fuh vek seng kher lo mai thei, tihsual palh te pawh kan nei ve ngei ang, chungah chuan kan mamawh tur chu Val Upa Council te hi in ni. Zilhhauh kan ngaih hunah rang takin rawn che ula, in thurawn hi engtiklai pawhin kan mamawh reng a ni,” a ti bawk.
ZPM President Lalliansawta pawhin Pathian leh mipui zarah an kuatah ro relna a lo tla ve ta tih sawiin, “Kan chungah mipuiin rinna an nghat a, mipuite hi kan tibeidawng ve thiang lo a ni,” a ti a. “ZPM te chuan eiru lo turin kan intiam a, kan eiru lo mai ni lovin kan hmuh phakah eirukna a awm lohna turin Pathian hrereng chunga kan kal angai a ni,” a ti bawk. He hunah hian sawrkar hmalak tawhna leh kal zel dan turte huamzau takin an sawiho bawk a ni.
Comments
Post a Comment