Nu ber mawhphurhna a pawimawh thu sawi

Sports Minister Lalnghinglova Hmar chuan chhungkua leh khawtlang tihhmasawnna kawng ah nu berte mawhphurhna chu mawhphurhna pawimawh berte zing ami a nih thu a sawi.

Tuikual South Branch MHIP buatsaih ‘MHIP Golden Jubilee Lawmna’ hun nimin-a YMA Hall, Tuikual South-a neih a hmanpuina ah Sports Minister Lalnghinglova Hmar chuan MHIP thuthlung pakua (9) te chu midangte tan a entawntlak ni thei tur khawpa a taka nunpuitu nih tum theuh turin kal-khawmte chu a chah a. Chhungkua leh khawtlang tihhmasawnna kawng ah nu berte mawhphurhna chu mawhphurhna pawimawh berte zing ami a nih thu sawiin, nu berte ngaih pawimawh leh rilru pek tamna a zirin hmasawnna hi a chakin a chak loh theih bawk thu a sawi a. Chhungkaw pawn lam a hlimna um thinna chuan chhungkua a tihchhiat thin thu sawiin, chhungkua a hun hman tam leh inpawhna tha neih a pawimawh thu a sawi bawk a ni.

Bialtu MLA ni bawk Lalnghinglova Hmar chuan zirna, hnathawhna hmun ah leh inelna hrang hrangah hmeichhiah ten hotu leh hmahruaitu nihna dinhmun an luah nual tawh thu sawiin, ram roreltu ni tur pawhin mipuiin hmeichhia ah rinna thui tak an nghah ngam tawh thu a sawi a. Ruihhlo chu ram leh hnam hmelma, chhungkua leh khawtlang tihrehawm theitu a nih angin ruihhlo dona kawngah Khawtlang, Kohhran leh Sawrkar thawhhona a pawimawh thu a sawi bawk.

Tuikual South Branch MHIP ten ‘MHIP Golden Jubilee Lawmna’ hun an buatsaih hi an President H. Lalawmpuii chuan kaihruaiin an Branch MHIP hmalakna hrang hrang ngaihthlak niin member boral mi 17 te sunna hun hman a ni a. Tuikual South Branch MHIP hnuaiah hian member 1617 an awm mek a. Member kum 70 chunglam mi 50 hnenah thil pek hlan an ni bawk.