Churachandpur leh Aizawl inkara Helicopter
Churachandpur (Manipur) leh Aizawl (Mizoram) inkara Helicopter thlawhtir leh turin ruahmanna siam mek a ni a, tunkar Zirtawpni hian thlawh tantir theih beisei a ni.
Manipur sawrkar Transport Department chuan kumin June ni 27-a an tihtawp tak Churachandpur leh Aizawl inkar a Helicopter Service chu chawlhkar khata vawi khat ni lovin vawi hnih thlawhtir turin hriattirna a chhuah a. Tunkar Thawhtanni, July ni 15 atanga thlawk tan tura tih a nih laiin Mizoram sawrkara Civil Aviation lam an hriattir tlai a. Thlawh tan tur ni atana ruat Thawhtanni hma Pathianni-a an hriat ve chauh avangin an inbuatsaih hman ta lova. Tunah hian July ni 19-a thlawk tan hman ngei tura ruahmanna siam a ni. Ruahman dan chuan Thawhtanni leh Zirtawpni apiangin Helicopter hi a thlawk thin dawn a. Churachandpur atanga lo thlawk hi Aizawl Mualpui Helipad-ah a lo tum anga. Haw lamah Lengpui tumhmun tlawh hmasa-in Churachandpur-ah a kir leh thin dawn a ni. Ministry of Home Affairs remtihna-in nikum September ni 27 khan Churachandpur leh Aizawl inkar Helicopter service hi a thlawk tan a, kumin June ni 27 khan tihtawp lailawk niin tunah hian chhunzawm a ni leh dawn ta a ni. Helicopter hman man za zela 75 hi MHA-in a tum (subsidise) sak a ni.Helicopter service hi a bik takin Churachandpur District leh Manipur tlangrama chengte tan a tangkai hle a. Imphal thlawhna tumhmun hnai hle mah se tlangmite tan kal ngam a nih loh bakah phai leh tlang ram mite an inthen fel a, an inawmpawlh tawh loh avangin kal chi a ni lova. Lirthei hmanga kalin Churachandpur leh Aizawl inkar hi KM 330 vel a ni a, kawng a chhiat avangin darkar 15 vel kawngah hun an hmang thin a ni.
Comments
Post a Comment