Zokhawsang-a Assam Rifles chungchang sawiho

Aizawl khawpui laili atanga Zokhawsang-a Assam Rifle sawn chungchang thil pawimawh te nimin khan Chief Minister Lalduhoma hovin Minister, Assam Rifle hotute leh Mizoram sawrkar mi pawimawh ten an sawiho.

Chief Minister Conference Hall-a he sawihona neih ah hian Chief Minister Lalduhoma chuan sawrkarna an lak hnuah Assam Rifles sawnchhuah chungchang hi engmah an la sawi chuak lo tih sawiin, “Central sawrkar rilru dik tak hriat kan duh avangin kan ngaichang a ni. Thla hmasa ni 20 a Union Home Minister Pu Amit Shah ka kawm tumin amah zawkin a sawi chhuak a. ‘Aizawl khawpui laili atanga Zokhawsang-a AR sawnchhuah hi thutlukna siamfel tawhsa a ni a, kan sawn ngei dawn a, hmalak tawh chin te enin August thla-a rawn zin ka tum a ni’ tiin. Chuvangin hmalak tawh chin te leh hmabak awm te rang taka kan umzui a ngai a, Joint Meeting hi kan buatsaih ta a ni,” a ti.

He thutkhawm ah hian Mizoram Home Department lamin a tir atanga tun thlenga hma an lo lak tawh chin te chipchiar takin an sawifiah a, chumi hnuah Department dangten an hmalakna pawimawh zual te an sawifiah ve bawk a. Assam Rifle lam hian loneitute tana an ram paltlangna kawng thar laih vang hian an Magazine Building leh Firing Point hmun te sawn a ngaih phah tur thu an tarlang a, Internal Road, Water Supply leh Electric Transformer chhe chungchang te pawh an sawi bawk a ni.

He Meeting hian, loneitute kawng thar vanga an hmunhma thenkhat sawn ngai te bawhzuiin Joint Inspection rang taka neih ni se an ti a. An tan kawng thar peih anih hma chu loneitute hi Security Pass siamsak nise an ti bawk. Zokhawsang Internal Road leh Electric Transformer te hi kum 5 kalta a Assam Rifles hnena hlan tawh an nih avangin a chhe siam hi an kut a ni tawh a. Siam tha tura a bawhzui dan kawng sawipui an ni a. Tui supply erawh chu Cyclone Remal lo thlen atanga tun thlenga Tui supply lama Aizawl khawpuiin harsatna a tawh vang a nih thu tarlan a ni.